شەرزات پولاتتىڭ ءىسى بويىنشا تەرگەۋ اياقتالدى. بۇل تۋرالى جابىرلەنۋشى تاراپتىڭ ادۆوكاتتارى مالىمدەدى، دەپ حابارلايدى “ادىرنا” ۇلتتىق پورتالى.
شەرزات پولاتتىڭ وتباسىنىڭ ادۆوكاتى كارينا كوشەرباەۆانىڭ ايتۋىنشا، سوتقا دەيىنگى تەرگەۋ اياقتالعان.
«17 قاڭتاردا شەرزاتتىڭ ولىمىنە قاتىستى قىشلمىستىق ءىس بويىنشا سوتقا دەيىنگى تەرگەۋ اياقتالدى. بۇل تۋرالى بىزگە تەرگەۋدەن حابارلاما كەلدى. ەندى ءبىز قىلمىستىق ءىس ماتەريالدارىمەن تانىسۋدى باستايمىز»، دەيدى كارينا كوشەرباەۆا.
ەسكە سالا كەتەيىك، 2024 جىلى 4 قازان كۇنى الماتى وبلىسىندا جاس جىگىتتەر جابىلىپ، 16 جاستاعى ءجاسوسپىرىم شەرزات پولاتتى ولتىرگەن بولاتىن. ءبىر توپ جىگىت ءجاسوسپىرىمدى تەپكىلەپ جاتقانىن ماڭايداعى تۇرعىندار ۆيدەوعا ءتۇسىرىپ العان.
كەيىن 12 قازانعا قاراعان ءتۇنى مارقۇمنىڭ وتباسىنىڭ ءۇيى ورتەنىپ كەتتى. شەرزاتتىڭ تۋىستارى ءورتتى كۇدىكتى تاراپتىڭ ارەكەتىمەن بايلانىستىردى.
2024 جەلتوقساندا شەرزات پولاتتىڭ اعاسى نۇرقانات عايىپباەۆ تا قازا تاپتى. ونى ءوز-وزىنە قول سالعان دەلىندى.
تالعاردا 10 جەلتوقسان كۇنى پوليتسيا قارجاۋباي نۇرىموۆتى ۇستادى. باۋىرى نۇرقانات عايىپباەۆتى قارا جەرگە تاپسىرعاننان كەيىن قارجاۋباي نۇرىموۆ پەن ونىڭ تۋعان-تۋىستارى قۇقىق قورعاۋ ورگاندارى قىزمەتكەرلەرىنەن تاعى دا ءادىل تەرگەۋدى تالاپ ەتكەن ەدى. ۆيدەو الەۋەتتىك جەلىلەردە پايدا بولعان. نۇرقانات پەن شەرزاتتىڭ تۋعان-تۋىستارى جولعا شىعىپ، بولعان جايتتى بايان ەتكەن. نارازىلىقتارىن جەتكىزگەن.
كەيىن شەرزاتتىڭ اكەسى مەن اپكەسى 15 كۇنگە قامالعانى بەلگىلى بولدى.
