تالعارداعى ءجاسوسپىرىم شەرزات پولاتتىڭ ولىمىنە قاتىستى ءىس بويىنشا سوتتالعاندار ۇكىممەن كەلىسپەي، تولىق اقتاۋدى تالاپ ەتتى، دەپ حابارلايدى "ادىرنا" ۇلتتىق پورتالى.
بۇل تۋرالى جابىرلەنۋشى تاراپتىڭ مۇددەسىن قورعاپ وتىرعان ادۆوكات مەيىرمان شەكەەۆ مالىمدەدى.
ادۆوكاتتىڭ ايتۋىنشا، سوتتالعان ازامات توقتاۋباەۆ پەن ديدار قالياحمەتوۆ كاسساتسيالىق شاعىم تۇسىرگەن. ولار سوت ۇكىمىمەن كەلىسپەي، وزدەرىن تولىق اقتاۋدى سۇراپ وتىر.
«شەرزات ءىسى بويىنشا كاسساتسيالىق شاعىمدار ءتۇستى. الايدا ولارمەن تانىسۋ مۇمكىندىگى بىزدە ەندى عانا پايدا بولدى. سوعان قاراماستان سوت وتىرىسى ەرتەڭگە، ياعني 7 ساۋىرگە بەلگىلەنگەن»، — دەدى شەكەەۆ.
ەسكە سالا كەتەيىك، 2025 جىلدىڭ مامىر ايىندا سوت ۇكىمىمەن ازامات توقتاۋباەۆ 15 جىلعا، ال ديدار قالياحمەتوۆ 7 جىلعا باس بوستاندىعىنان ايىرىلعان بولاتىن.
ولار 2024 جىلدىڭ 4 قازانىنا قاراعان ءتۇنى تالعار قالاسىندا 16 جاستاعى شەرزات پولاتتى ءولتىردى دەپ ايىپتالعان.
