17 قاڭتاردا ىستامبۇلدا قازاقستان ستۋدەنتتەرىنە ارنالعان "Janym Qazaqstan" قازاقستاندىق ءفيلمىنىڭ جابىق كورسەتىلىمى ءوتتى. قازاقستان رەسپۋبليكاسىنىڭ باس كونسۋلدىعى مەن "شىمبۇلاق" تاۋ شاڭعىسى كۋرورتىنىڭ قولداۋىمەن ۇيىمداستىرىلعان ءىس-شاراعا 400-دەن استام ستۋدەنت جينالىپ، وسى بىرەگەي جوبانىڭ العاشقى كورەرمەندەرى اتاندى. QazaqGeography جانە QG Production بىرلەسكەن جوباسى جاستار اراسىندا ۇلكەن تولقىندار تۋدىردى.
«فيلمدەگى وقيعا جۇرەككە اسەر ەتىپ، ءوزىمىزدىڭ مۇرا مەن تابيعاتىمىزدى باعالاۋدىڭ ماڭىزدىلىعى تۋرالى وي سالدى»،— دەپ ىستامبۇلدا وقيتىن قازاقستاننان كەلگەن ستۋدەنت ءوز ويىمەن ءبولىستى.
كەشكە ىستامبۇلداعى قازاقستان رەسپۋبليكاسىنىڭ باس كونسۋلى امانقۇل نۇريددين، جوبانىڭ باس پروديۋسەرى جاسۇلان سەيسەنحانوۆ، ءفيلمنىڭ باستى كەيىپكەرى ءىلياس كوپجاساروۆ، كومپوزيتور كەنجەبەك نۇردولداي قوناق بولىپ قاتىستى.
سونىمەن قاتار جابىق كورسەتىلىمگە ميمار سينان ۋنيۆەرسيتەتىنىڭ پروفەسسورى، تۇرىك عالىمى ابدۋلۆاحاپ كارا، قازاق-تۇرىك ءبىلىم جانە زەرتتەۋلەر قوعامىنىڭ باسشىسى سۋلەيمان وزتوپراك، "قازاق ەلى" جۋرنالىنىڭ باس رەداكتورى ەرتولكۋن گايرەتۋللاح، كاسىپكەر، "Gamma d 'oro"كومپانياسىنىڭ باسشىسى سەرىك تولەكوۆ، "شىنىراق" قازاق كافەسىنىڭ باسشىسى دانيار يمانباكوۆ كەلدى.
فيلم امبەباپ تاقىرىپ – ماحاببات، دوستىق جانە مادەني الماسۋدىڭ ماڭىزدىلىعى ارقاسىندا قازاقستاننان تىس جەرلەردە قىزىعۋشىلىق تۋدىردى.
«بۇگىنگى فيلم شىنىمەن دە ءبىزدى قۋانتىپ جانە ماقتانىش سەزىمىن تۋدىردى. بىزدە الەمگە كورسەتەتىن كوپ نارسە بار. بۇل اريزونا، جاڭا زەلانديا نەمەسە شۆەيتساريا ەمەس. بۇل ءبىزدىڭ باي، ەرەكشە قازاقستانىمىز، ول نازار اۋدارۋعا جانە تاڭدانۋعا لايىق»،– دەپ اتاپ ءوتتى قازاقستان رەسپۋبليكاسىنىڭ ىستامبۇلداعى باس كونسۋلى امانقۇل نۇريددين.
سونىمەن قاتار ءفيلمدى تاماشالاۋعا جينالعان ستۋدەنتتەر ءوز پىكىرىن ءبىلدىردى.
«فيلم ءبىزدىڭ تامىرىمىز كۇش پەن شابىتتىڭ قاينار كوزى ەكەنىن ەسكە سالادى. مەن قازاقستاننىڭ الەمدىك اۋديتوريانى قىزىقتىراتىن جوبالاردى جاساي الاتىنىن ماقتان تۇتامىن،»،—دەگەن ىقىلاستارىن جەتكىزدى ولار.
