20 قاڭتار — ازەربايجاندا توتاليتارلىق ءتارتىپتىڭ قۇرباندارىن ەسكە الۋ كۇنى، دەپ حابارلايدى «ادىرنا» ءتىلشىسى.
كەڭەس وداعى ىدىراي باستاعان 90-شى جىلدارى ارميانداردىڭ شابۋىلدارى مەن اۋماقتىق تالاپتارىنىڭ ارتۋىنا قارسى كوتەرىلگەن ازەربايجان حالقى 1990 جىلى 20 قاڭتار كۇنى شابۋىلدارعا نارازىلىق ءبىلدىرۋ ءۇشىن باكۋدە جينالعان ەدى. الايدا باسقىنشى ارميانداردى توقتاتادى دەپ كۇتكەن كەڭەس ارمياسى بەيبىت نارازىلىق بىلدىرگەن ازەربايجاندىقتاردى نىساناعا الدى.
وسىلايشا كسرو باسشىلىعىنىڭ بۇيرىعىمەن 26 مىڭ ادامدىق كەڭەس اسكەرى باكۋ، سۇمعايىت جانە ازەربايجاننىڭ باسقا دا قالالارىنا باسىپ كىرگەن بولاتىن. بۇل اسكەري ارالاسۋدىڭ ناتيجەسىندە 147 بەيبىت تۇرعىن قازا تاۋىپ، 744-ءى اۋىر جاراقاتقا ۇشىرادى.
1994 جىلدىڭ اقپان ايىندا وتكىزىلگەن ميللي مەدجليستىڭ ارنايى وتىرىسىندا 1990 جىلدىڭ 20 قاڭتارى كۇنى بەيكۇنا ادامداردىڭ ايۋاندىقپەن ءولتىرىلۋى اسكەري اگرەسسيا جانە قىلمىس رەتىندە باعالانىپ، 1994 جىلدىڭ ناۋرىزىنداعى تالقىلاۋلار ناتيجەسىندە «1990 جىلدىڭ 20 قاڭتارى كۇنى باكۋ قالاسىندا بولعان قايعىلى وقيعالار تۋرالى» شەشىم قابىلداندى.
وقيعا قازىرگى ازەربايجان تاريحىنا «قارالى قاڭتار» دەگەن اتپەن ەندى.
