قازاقستاندىق سەيسمولوگتار الماتىدان 364 شاقىرىم قاشىقتىقتا جەر سىلكىنىسىن تىركەدى، دەپ حابارلايدى "ادىرنا" ۇلتتىق پورتالى.
توتەنشە جاعدايلار مينيسترلىگىنىڭ مالىمەتىنشە، "ننتسسني" جشس سەيسميكالىق ستانتسيالار جەلىسى 19 قاڭتاردا استانا ۋاقىتى بويىنشا ساعات 11:30-دا جەر سىلكىنىسىن تىركەگەن.
"جەر سىلكىنىسىنىڭ ەپيتسەنترى قىتاي اۋماعىندا، الماتىدان وڭتۇستىك-شىعىسقا قاراي 364 شاقىرىم جەردە ورنالاسقان", - دەلىنگەن حابارلامادا. قازاقستان اۋماعىندا جەر سىلكىنىسى سەزىلمەگەن.
قازاقستان ۇلتتىق دەرەكتەر ورتالىعىنىڭ حابارلاۋىنشا، جەر استى دۇمپۋلەرىنىڭ ماگنيتۋداسى 4,4 بولعان.
ەسكە سالا كەتەيىك، 17 قاڭتار كۇنى الماتىدان سولتۇستىك-شىعىسقا قاراي 220 شاقىرىم جەردە جەر سىلكىنىسى تىركەلگەن ەدى. سەيسميكالىق ستانتسيالار جەلىسى جەر سىلكىنىسى جەتىسۋ وبلىسى، پانفيلوۆ اۋدانى، جاركەنت قالاسىندا 2 بالل، الماتى وبلىسى، ۇيعىر اۋدانى، شونجى اۋىلىندا 2 بالل بولىپ سەزىلگەنىن حابارلادى.
