ستانيسلاۆ چەرچەسوۆ قازاقستان ۇلتتىق قۇراماسىن 2026 جىلعى الەم چەمپيوناتىنىڭ ىرىكتەۋ كەزەڭى اياقتالعانشا جاتتىقتىراتىن بولادى. بۇل تۋرالى قازاقستان فۋتبول فەدەراتسياسىنىڭ پرەزيدەنتتىگىنە جاقىندا سايلانعان مارات وماروۆ ايتتى، دەپ حابارلايدى “ادىرنا” ۇلتتىق پورتالى.
"چەرچەسوۆ قازاقستان قۇراماسىمەن جۇمىسىن جالعاستىرۋدا. ول فەدەراتسيا پرەزيدەنتىمەن كەزدەسۋ وتكىزىپ، الەم چەمپيوناتىنىڭ ىرىكتەۋىنە دايىندىق جوسپارىن تالقىلادى. ناۋرىزعا دەيىن ۋاقىت از قالدى، ەشقانداي وزگەرىستەر كۇتىلمەيدى، ءبارى جۇمىس تارتىبىندە. فەدەراتسيا تاراپىنان باپكەرگە سەنىم بار ما؟ ارينە، ول كوماندامەن جۇمىسىن جالعاستىرۋدا", — دەدى "ماتچ تۆ" ارناسىنا قازاقستان فۋتبول فەدەراتسياسىنىڭ (قفف) باسقارۋشى ديرەكتورى قايسار بەكەنوۆ.
بۇعان دەيىن چەرچەسوۆ پەن قازاقستان فۋتبول فەدەراتسياسىنىڭ جاڭا پرەزيدەنتى مارات وماروۆتىڭ كەزدەسكەنى جايلى ايتىلعان ەدى.
جەلتوقسان ايىندا كوممەنتاتور ەرمۇحامەد ماۋلەن ءوزىنىڭ Telegram-ارناسىندا جاڭا قفف پرەزيدەنتى مارات وماروۆ چەرچەسوۆتى وتستاۆكاعا جىبەرەدى دەپ جازعان بولاتىن. كەيىن فەدەراتسيانىڭ ءباسپاسوز قىزمەتى بۇل اقپاراتتى جوققا شىعاردى.
رەسەيلىك مامان 2024 جىلدىڭ ماۋسىم ايىندا قازاقستان ۇلتتىق قۇراماسىن باس باپكەر رەتىندە قابىلدادى، بۇل قىزمەتتە ول ماگومەد اديەۆتى اۋىستىردى. قازاقستان قۇراماسى 2024 جىلعى ەۋروپا چەمپيوناتىنا قاتىسۋ قۇقىعىن الا المادى، قازىرگى ۋاقىتتا حالىقارالىق فۋتبول فەدەراتسياسى (فيفا) رەيتينگىندە ماۆريتانيا مەن ناميبيانىڭ اراسىندا 110-ورىندا تۇر.
قاراشا ايىندا قازاقستان قۇراماسى ۋەفا ۇلتتار ليگاسىنىڭ توپتىق كەزەڭىندەگى سوڭعى ماتچىندا نورۆەگيادان 0:5 ەسەبىمەن جەڭىلىس تاپتى. ۇلتتىق قۇراما 1 ۇپاي جيناپ، كەلەسى ماۋسىمدى ليگا C-دە وتكىزەدى. قازاقستان قۇراماسى الەم چەمپيوناتىنىڭ ىرىكتەۋ كەزەڭىندەگى العاشقى ماتچتارىن ناۋرىز ايىندا ۋەلس جانە ليحتەنشتەين كوماندالارىنا قارسى وتكىزەدى.
