قىرعىزستاندىق بەلگىلى ءانشى قايرات پريمبەرديەۆ وزىنە قاتىستى قوعامدا تۋىنداعان داۋ-دامايعا تۇسىنىكتەمە بەردى. بۇل تۋرالى Instagram پاراقشاسىنا ۆيدەو جاريالادى، دەپ حابارلايدى “ادىرنا” ۇلتتىق پورتالى.
ءانشى «Airan» YouTube-ارناسىنا بەرگەن سۇحباتىندا كەنەسارى حاننىڭ باسىن الۋ وقيعاسىن قوزعاپ، وسى جاعداي ءۇشىن قازاق حالقىنان ءوز اتىنان كەشىرىم سۇراعان بولاتىن.
«ورمون حان كەنەسارى حاننىڭ باسىن الۋعا ءماجبۇر بولدى. مەن ءوز اتىمنان قازاق حالقىنان وسى وقيعا ءۇشىن كەشىرىم سۇراعىم كەلەدى. بۇل وقيعا مەن ءۇشىن دە اۋىر، ءتىپتى كوزىمە جاس كەلەدى. ءبىز كەنەسارى حاننىڭ باسىن ءوز ەلىنە جەتكىزىپ، قۇران وقىپ، وسى وقيعاعا قاتىستى رەنىشتى جويۋىمىز كەرەك»، – دەدى ءانشى سۇحبات بارىسىندا.
سۇحباتتان كەيىن پريمبەرديەۆتىڭ ايتۋى بويىنشا، ونىڭ ايتقان سوزدەرىنە قاتىستى الەۋمەتتىك جەلىلەردە ءتۇرلى پىكىرلەر مەن قارسىلىقتار پايدا بولعان. بىرقاتار قولدانۋشىلار ءانشىنىڭ بۇل تاقىرىپتى كوتەرگەنىن ورىنسىز دەپ ەسەپتەدى. وسىدان كەيىن قايرات ءوزىنىڭ Instagram پاراقشاسىندا ۆيدەو ارقىلى جاعدايدى تۇسىندىرۋگە ءماجبۇر بولدى.
«مەن سۇحبات بەرگەندە، مەن بۇكىل قىرعىز حالقىنان ەمەس، تەك ءوز اتىمنان كەشىرىم سۇرادىم، بۇل ءوز ءسوزىم. مەنىڭ سۇحباتىم ءبىر ساعاتتان استام ۋاقىتقا سوزىلدى، بىراق مۇمكىن فورماتقا بايلانىستى شىعار، دەگەنمەن تەك مەنىڭ كەشىرىم سۇراعان ءسوزىم، قىسقا ءۇزىندىسى عانا جاريالاندى. ەگەر سۇحباتتى تولىق تىڭداساڭىز، مەنىڭ سوزدەرىمنىڭ ءمانى، ونىڭ شىنايىلىعى مەن ادال نيەتىم تۇسىنىكتى بولار ەدى»، — دەدى ءانشى ۆيدەو حابارلاماسىندا.
