ساۋدا جانە ينتەگراتسيا ءمينيسترى ارمان شاققاليەۆ ەۋرازيا ەكونوميكالىق وداعىنداعى كەدەندىك باج سالىعى جوعارىلاۋى مۇمكىن ەكەنىن ايتتى، دەپ حابارلايدى “ادىرنا” ۇلتتىق پورتالى.
ارىپتەستەر مينيسترگە «بيىل ەۋرازيا ەكونوميكالىق وداعىنىڭ قۇرىلعانىنا 10 جىل بولدى. اتالعان وداقتىڭ كەدەندىك باج سالىعىنىڭ 84 پايىزى رەسەيگە، ال 7 پايىزى قازاقستانعا تيەسىلى. الداعى ۋاقىتتا وسى جۇيە وزگەرە مە؟ ياعني 7 پايىزدان 15-20 پايىزعا ارتتىرۋ جوسپاردا بار ما؟ ەكونوميستەر 7 پايىز تىم از ەكەنىن ايتادى؟» دەگەن سۇراق قويىلدى.
ارمان ابايۇلىنىڭ ايتۋىنشا، بۇل ماسەلە كۇن تارتىبىندە تۇر.
«وتكەن جىلى ەۋرازيا ەكونوميكالىق وداقتىڭ جۇمىس توبىندا بىرنەشە تالقىلاۋ ءوتتى. مەتودولوگيا جاعىنان كەدەندىك باج سالىعىن ارتتىرۋعا بايلانىستى 2-3 نۇسقا بار. بىراق 15 نەمەسە 20 پايىزعا كوتەرەمىز دەپ ناقتى ايتا المايمىن. وتكەن جىلى ۇكىمەت دەڭگەيىندە ۇكىمەتارالىق وتىرىس ءوتىپ، كوللەگيانىڭ جاۋاپتى مۇشەسى بايانداما جاسادى. بۇل ماسەلە ءبىزدىڭ جوسپارىمىزدا بار. سەبەبى الەمدەگى گەوساياسات وزگەردى جانە ساۋدا جاعىنان وزگەرىستەر بولىپ جاتىر»، – دەدى ول.
جۋرناليست قوسىمشا «كەدەندىك باج سالىعى قانشا پايىزعا كوتەرىلۋى مۇمكىن؟ ناقتى قاي ۋاقىتتا وگەرەدى؟ بيىل ما، كەلەر جىلى ما، جوق الدە بۇل ءسوز كۇيىندە قالا ما؟» دەپ سۇراق قويدى.
مينيستر بۇل ماسەلە ءجاي ءسوز بولىپ قالمايتىنىنا سەندىردى.
«بۇل ماسەلە كۇن تارتىبىندە تۇر جانە وعان بايلانىستى ءبىر شەشىم قابىلداناتىن بولادى. قازىرگى 6,99 پايىزدىڭ قانشالىقتى جوعارىلايتىنى مەتودولوگيا بايلانىستى بولماق. اتالعان مەتودولوگيا كەدەندىك باج سالىعىن 8 پايىزعا دەيىن كوتەرۋگە مۇمكىندىك بەرەدى. ەكىنشى مەتودولوگيا ءجىو جانە ءۇشىنشى كەدەندىك باجدارعا بايلانىستى بولماق. وسى جىلدىڭ اياعىنا دەيىن اقپارات بولادى»، – دەدى ول.
