الماتىدا ەرلى-زايىپتىلاردىڭ پاتەرىنە كىرىپ، يەلەرىنە وق اتقان 38 جاستاعى ەر ادام ۇستالدى. بۇل تۋرالى پوليتسيا دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 20 جەلتوقساندا الماتىنىڭ ناۋرىزباي اۋدانىنداعى تۇرعىن ءۇي كەشەنىنە قارۋلى ادام باسىپ كىرىپ، ەكى ادامدى اتىپ كەتكەن. پوليتسيانىڭ مالىمەتىنشە، قاراقشىلىق شابۋىل سالدارىنان ەرلى-زايىپتىلار اۋىر جاراقات العان. ولار قازىر اۋرۋحانادا.
بۇل قىلمىستى اشۋ ماقساتىندا جەدەل-تەرگەۋ توبى قۇرىلدى. شابۋىل جاساعان ادامنىڭ كىم ەكەنى انىقتالدى. بۇل – جەتىسۋ وبلىسىنىڭ 38 جاستاعى تۇرعىنى. ول ءبىر كۇن بۇرىن ۇستالىپ، قاماۋعا الىندى.
كۇدىكتى جاقىندا عانا ءوزى بارىپ، جاڭا جيھازدارىن ورناتىپ بەرگەن ەرلى-زايىپتىنى توناماق بولعانىن مويىندادى. سول كەزدە ولاردىڭ سەيفىن بايقاپ قالعان. بەتىن مەديتسينالىق ماسكا جانە شارفپەن جاسىرىپ، جۇما كۇنى تاڭەرتەڭ ولاردىڭ ەسىگىنىڭ قوڭىراۋىن باسقان. جابىرلەنۋشىلەردى تاپانشامەن قورقىتىپ، ولاردان اقشا بەرۋىن تالاپ ەتكەن. الايدا وتاعاسى كومەككە شاقىرا باستاعان. وسى كەزدە كۇدىكتى ەرلى-زايىپتىنى اتىپ، قاشىپ كەتكەن.
سوتقا دەيىنگى تەرگەۋ جالعاسىپ جاتىر. قىلمىستىڭ باسقا دا ءمان-جايلارى انىقتالادى.
