شىمكەنتتە ەسىرتكىلىك ماساڭ كۇيدەگى جۇرگىزۋشى جول ەرەجەسىن بۇزىپ، پوليتسيا ينسپەكتورىن كولىگىنىڭ كاپوتىندا سۇيرەگەن وقيعا تىركەلدى، دەپ حابارلايدى “ادىرنا” ۇلتتىق پورتالى قالالىق پد-عا سىلتەپ.
وقيعا 2 قاڭتار كۇنى ورىن العان. پاترۋلدىك پوليتسەيلەر Toyota Highlander كولىگىن باعدارشامنىڭ قىزىل تۇسىنەن وتكەنى ءۇشىن توقتاتقان. جۇرگىزۋشىنىڭ مىنەز-قۇلقىنان كۇماندانعان ءتارتىپ ساقشىلارى ونىڭ ەسىرتكى قولدانعانىن انىقتاپ، قۇجاتتارىن كورسەتۋىن تالاپ ەتەدى. الايدا جۇرگىزۋشى بۇل تالاپتى ەلەمەي، وقيعا ورنىنان كەتۋگە تىرىستى.
پوليتسيا ينسپەكتورى باقىتجان بورانباي جول قوزعالىسىنداعى باسقا قاتىسۋشىلاردىڭ قاۋىپسىزدىگىن قامتاماسىز ەتۋ ءۇشىن كولىكتىڭ الدىنا شىعىپ، توسقاۋىل بولعان. بىراق جۇرگىزۋشى كولىگىن توقتاتپاي، پوليتسەيدى كاپوتىندا بىرنەشە مەترگە دەيىن سۇيرەپ، وقيعا ورنىنان قاشىپ كەتكەن.
پوليتسيا قىزمەتكەرلەرى كۇدىكتىنى ءىزىن سۋىتپاي ۇستاپ، مەديتسينالىق تەكسەرىس ونىڭ ەسىرتكىلىك ماساڭ كۇيدە بولعانىن راستادى.
قازىرگى ۋاقىتتا كۇدىكتى قاماۋعا الىندى، وعان قاتىستى قىلمىستىق ءىس قوزعالىپ، تەرگەۋ امالدارى جۇرگىزىلۋدە. جۇرگىزۋشىگە “بيلىك وكىلىنە قاتىستى ومىرىنە نەمەسە دەنساۋلىعىنا قاۋىپتى كۇش قولدانۋ” بابى بويىنشا ايىپ تاعىلدى. ەگەر كىناسى دالەلدەنسە، ول 12 جىلعا دەيىن باس بوستاندىعىنان ايىرىلۋى مۇمكىن.
