بۇگىن ۇلىتاۋ وبلىسى پوليتسيا دەپارتامەنتىندە بالالار اراسىندا وتكەن «پوليتسيا بالالار كوزىمەن» اتتى سۋرەت بايقاۋىنىڭ قورىتىندىسى شىعارىلىپ، جەڭىمپازدار ماراپاتتالدى.
شاراعا بايقاۋعا قاتىسقان جاس سۋرەتشىلەر مەن ولاردىڭ اتا-انالارى، سونداي-اق پوليتسيا ارداگەرلەرى مەن دەپارتامەنت باسشىلىعى قاتىستى.
ءىس-شارانىڭ ماقساتى – بالالاردىڭ شىعارماشىلىق قابىلەتىن دامىتۋ، پوليتسيا قىزمەتكەرلەرىنىڭ كۇندەلىكتى ەڭبەگىن جاس ۇرپاققا تانىستىرۋ جانە قوعامداعى ءتارتىپ ساقشىلارىنىڭ بەدەلىن ارتتىرۋ بولدى.
وبلىستىق پوليتسيا دەپارتامەنتى تاربيە جانە كادر جۇمىسى باسقارماسىنىڭ باستىعى الديار ابىشەۆ بالالاردىڭ اتا-انالارىنا بەلسەندىلىك تانىتىپ، بالالارىنىڭ ونەرگە قىزىعۋشىلىعىن قولداعاندارى ءۇشىن العىس ءبىلدىردى.
«مۇنداي شىعارماشىلىق بايقاۋلار وسكەلەڭ ۇرپاقتىڭ بويىندا وتانسۇيگىشتىك سەزىم مەن قۇقىقتىق مادەنيەتتى قالىپتاستىرۋعا ىقپال ەتەدى. بالالار ءوز ەڭبەكتەرى ارقىلى پوليتسيا قىزمەتىنىڭ قوعامداعى ماڭىزىن ەرەكشە قىرىنان كورسەتە ءبىلدى»، – دەدى الديار ابىشەۆ.
بايقاۋعا ۇسىنىلعان سۋرەتتەردە بالالار پوليتسيا قىزمەتكەرلەرىنىڭ باتىلدىعى مەن ادىلدىگىن، قوعام قاۋىپسىزدىگىن قورعاۋداعى ءرولىن ءوز كوزقاراستارىمەن بەينەلەگەن.
ماراپاتتاۋ راسىمىندە ۇزدىك دەپ تانىلعان قاتىسۋشىلارعا العىس حاتتار مەن باعالى سىيلىقتار تابىستالدى.
ءىس-شارا سوڭىندا قاتىسۋشىلار پوليتسيا دەپارتامەنتى عيماراتىندا ۇيىمداستىرىلعان بالالار شىعارمالارىنىڭ كورمەسىن تاماشالادى.
