ۇكىمەت باسشىسى اسقار مامينگە جامبىل وبلىسىنىڭ اكىمى اسقار مىرزاحمەتوۆ جوبانىڭ جاي-جاپسارى، جۇزەگە اسىرىلۋ بارىسى مەن دايىندىعى تۋرالى جان-جاقتى باياندادى.
اشىعىن ايتۋ كەرەك، اۋىلدى جەردەگى حالىقتى جاپپاي جۇمىسپەن قامتۋدىڭ بىردەن ءبىر جولى – ول قوسالقى شارۋاشىلىققا قولداۋ كورسەتىپ، دامىتۋ. وسى ورايدا بۇعان دەيىن حابارلاعانىمىزداي وبلىس اكىمىنىڭ ءوزى باستاعان جۇمىسشى توپ وڭىردەگى بارلىق اۋدان، اۋىلدىق ەلدىمەكەندەرگە ارنايى بارىپ، 138 مىڭ اۋلا تولىق زەردەلەنگەن بولاتىن.
«تالداۋ ناتيجەسى كورسەتكەندەي، سالىستىرمالى تۇردە تۇرعىندار قوسالقى شارۋاشىلىقتى ءتيىمدى تابىس كوزىنە اينالدىرا الماي وتىر. سەبەپ – ءتيىستى ۇيىمداستىرۋ جۇمىستارىنىڭ تومەندىگى. وسى تۇرعىدا زەردەلەۋ بارىسىندا تۇرعىنداردىڭ ۇسىنىستارىمەن حالىقتىڭ تۇرمىسىن جاقسارتۋعا باعىتتالعان 5 باعىت قاراستىرىلىپ وتىر. ولار: ءۇي ىرگەسىندەگى جانە اۋىل سىرتىنداعى (پايلىق) جەرلەردى ءتيىمدى پايدالانۋ، ءۇي اۋلاسىندا مال جانە قۇس ونىمدىلىگىن ارتتىرۋ، قوسالقى شارۋاشىلىقتاردى جەمىستى جۇرگىزۋگە قولبايلاۋ-ماسەلەلەردى كووپەراتيۆتەر ارقىلى شەشۋ جانە اۋىلداعى شاعىن جوبالاردى قارجىلاندىرۋ. بۇل 5 باعىت بويىنشا جالپى قۇنى 46,4 ميلليارد تەڭگە كولەمىندە 31 مىڭنان استام جوبانى ىسكە اسىرۋ مۇمكىنشىلىگى انىقتالىپ وتىر. ناتيجەسىندە 131 مىڭ وتباسى نەمەسە 600 مىڭنان استام ادام ايىنا ورتاشا ەسەپپەن 128 مىڭ تەڭگە كولەمىندە تۇراقتى تابىسپەن قامتىلىپ، 68 مىڭ تۇرعىن ءوزىن-ءوزى جۇمىسپەن قامتىعاندار مەن جۇمىسسىزدار جەكە كاسىپكەرگە اينالادى دەپ كۇتىلۋدە. سول سەكىلدى، اۋىل شارۋاشىلىعىنىڭ جالپى ءونىمى 34 پايىزعا ۇلعايىپ، ءسۇت پەن ەتتى قايتا وڭدەۋ كاسىپورىندارىنىڭ جۇكتەمەسى 30 پايىزعا ارتۋى ەسەپتەلگەن»، – دەدى اسقار يسابەكۇلى.
ءاۋ باستا پيلوتتىق جوبانىڭ جەمىستىلىگىنە كوز جەتكىزۋ ءۇشىن ءارى جۇمىستىڭ ۇلگى-باستاۋى رەتىندە وبلىستىڭ ون اۋىلدىق وكرۋگى تاڭدالىپ الىنىپ وتىر. ول – جوسپارلى جۇمىستىڭ العاشقى كەزەڭى بولماق. جامبىل وبلىسىنىڭ اكىمى ۇكىمەت باسشىسىنا العاشقى كەزەڭدە اتقارىلار جۇمىستار تۋرالى ايتتى.
«ون اۋىلدىق وكرۋگ بويىنشا 7 مىڭنان استام اۋلا قامتىلادى دەسەك، وندا 1117 گەكتار ءۇي ىرگەسىندەگى جەرلەر بار. شارا بارىسىندا سول جەرلەردى ۇتىمدى ۇقساتۋدىڭ جولدارى ناقتى جۇزەگە اسپاق. باۋ-باقشالىقتىڭ تيىمدىلىگىن ەسەسلەۋدە جىلىجايلاردىڭ، مال شارۋاشىلىعىن كوتەرۋدە كووپەراتيۆتەردىڭ ماڭىزدىلىعى ەسكەرىلگەن. سونداي-اق، ول ءۇشىن ساپالى تۇقىم، كوشەت، تىڭايتقىشتاردى تاۋىپ، جەتكىزىپ بەرۋ، ءتىپتى، تاپشى تەحنيكا مەن قاجەتتى ماماندارمەن قامتۋ ماسەلەسى دە وڭىنان تارقاتىلماق»، – دەدى اكىم.
ايتا كەتەيىك، زەردەلەۋ بارىسىندا مۇنداعى ءار اۋىلدىق وكرۋگتىڭ تابيعاتى، جەرى، سۋى ەسكەرىلگەن. ناقتى ناتيجەدە ونىمدىلىكتىڭ 2-4 ەسە وسىمىنە قول جەتكىزۋ جوسپارلانعان. پيلوتتىق اۋىلدىق وكرۋگتەردە قوسالقى شارۋاشىلىقتان بولەك 137 شاعىن جوبالاردىڭ ءتىزىمى جاساقتالىپ، جۇزەگە اسىرۋدىڭ جول-جوباسى بەكىتىلگەن.
ءوڭىر باسشىسى جوبانى قارجىلاندىرۋ شاراسى اكىمدىككە كرەديت بەرۋ جۇيەسىمەن «ەڭبەك» باعدارلاماسى اياسىندا ىسكە اسىرۋ ۇسىنىلاتىنىن ايتىپ، اكىمدىك، ارى قاراي سەنىم اگەنتى ارقىلى 2,5 پايىزدىق نەسيە رەتىندە تۇرعىنداردى، كووپەراتيۆتەردى قارجىلاندىراتىنىن جەتكىزدى. بۇگىندە نەسيە الۋشىلاردىڭ العاشقى بازاسى ءتۇزىلىپ ۇلگەرىلگەن.
جالپى، ون اۋىلدىق وكرۋگ بويىنشا جوبالاردىڭ ىسكە اسۋىمەن 7 مىڭ وتباسى نەمەسە 35 مىڭ ادام كەلەسى جىلدىڭ قورىتىندىسىمەن ايىنا كەمىندە 104 مىڭ تەڭگە ء(وسىم 2,5 ەسە) تابىسپەن قامتاماسىز ەتىلەدى دەپ كۇتىلۋدە. 2229 ءوزىن-ءوزى جۇمىسپەن قامتىعاندار مەن جۇمىسسىزدار مىندەتتى زەينەتاقى، سالىق جانە باسقا دا تولەمدەردى تولەيتىن كاسىپكەرلەرگە اينالماق.
«ءبىز جوبانى ىسكە اسىرۋعا دايىنبىز. اكىمدىككە قاتىستى بارلىق ۇيىمداستىرۋ پىسىقتالعان. سونىڭ ىشىندە بيۋدجەتتىك اكىمشى بولاتىن اۋىل شارۋاشىلىق باسقارماسىنىڭ شتاتتىق سانى 18 قىزمەتكەرگە كوبەيتىلدى. اۋدان، اۋىل اكىمدەرىنىڭ ارنايى جۇمىس الگوريتىمى بەكىتىلدى، ءتيىستى جۇمىس توپتارى قۇرىلدى جانە جاۋاپتى ماماندار وقىتىلدى. پيلوتتىق اۋىل وكرۋگتەرىندە بىرنەشە كەزدەسۋلەر وتكىزىلىپ، كووپەراتيۆ توراعالارى انىقتالدى»، – دەدى باسشىسى اسقار مىرزاحمەتوۆ.
ءوز كەزەگىندە پرەمەر-مينيستر اسقار مامين بۇل جوبانىڭ ماڭىزدىلىعىن اتاپ ءوتىپ، قولدايتىنىن ءبىلدىرىپ، ءتيىستى شەشىمدەردىڭ دەر كەزىندە راسىمدەلۋىن نازارعا الاتىنىن جەتكىزدى. جاۋاپتى تۇلعالارعا پيلوتتىق جوبانىڭ مەحانيزىمىن ۇيىمداستىرۋدى تاپسىردى. پيلوتتىق جوبا جامبىل وبلىسىندى ناتيجەلى جۇزەگە اسسا، باسقا وڭىرلەرگە دە ەنگىزۋ بارىسى ايتىلدى.
«ادىرنا»
ۇلتتىق پورتالى
