پەتروپاۆلدا الەۋمەتتىك جەلى ارقىلى سولتۇستىك قازاقستاندى رەسەي فەدەراتسياسىنا قوسۋدى ۇسىنعان ەرلى-زايىپتىلار بەس جىلعا باس بوستاندىعىنان ايىرىلدى، دەپ حابارلايدى “ادىرنا” ۇلتتىق پورتالى.
سوت قر قك-ءنىڭ 180-بابىنىڭ 2-بولىگى (قازاقستان رەسپۋبليكاسىنىڭ بىرتۇتاستىعى مەن تۇتاستىعىن، ونىڭ اۋماعىنىڭ قول سۇعىلماۋشىلىعى مەن بولىنبەستىگىن جانە مەملەكەتتىڭ ىدىراۋىن ۇگىتتەۋ) بويىنشا ەرلى-زايىپتىلارعا قاتىستى قىلمىستىق ءىس قوزعادى.
ءىس ماتەريالدارىنان انىقتالعانداي، ەرلى-زايىپتىلار الەۋمەتتىك جەلىلەردە قازاقستان رەسپۋبليكاسىنىڭ رەسەيگە سولتۇستىك قازاقستان وبلىسىنىڭ قوسىلۋىنا قاتىستى «قازاقستان رەسپۋبليكاسىنىڭ بىرتۇتاستىعىن ساقتاۋ تۇرعىسىنان ساياسي جانە الەۋمەتتىك تاۋەكەلدەرگە اكەپ سوقتىراتىن الەۋمەتتىك قاۋىپتى مالىمدەمەلەر» جاريالاعان. ولار بۇل تۋرالى «چات رۋلەتكا» قوسىمشاسىندا ايتقان.
ايتا كەتەيىك، بۇل قوسىمشا بارلىق الەمنىڭ پايدالانۋشىلارمەن بەينە ارقىلى بايلانىسۋعا مۇمكىندىك بەرەتىن تانىمال سەرۆيس.
"ەرلى-زايىپتىلاردىڭ وزدەرىنە تاعىلعان ارەكەتتى جاساۋداعى كىناسى ءىس ماتەريالدارىمەن دالەلدەنگەن. سوتتالۋشىلاردىڭ كىناسىن مويىنداماعانىنا قاراماستان، ەرلى-زايىپتىلاردىڭ كىناسى دالەلدەندى. ىسكە بەينەجازبا تىركەلىپ، ءمان-جاي جازىلعان. قىلمىستىق قۇقىق بۇزۋشىلىقتى جاساعانى جانە وعان قاتىستى كەشەندى سوت-پسيحولوگيالىق-فيلولوگيالىق ساراپتاماسى جۇرگىزىلگەنى انىقتالدى»، - دەپ حابارلادى سولتۇستىك قازاقستان وبلىسى سوتىنىڭ ءباسپاسوز قىزمەتى.
پروكۋرور ايىپتالۋشىلاردىڭ ارقايسىسىن 5 جىلدان باس بوستاندىعىنان ايىرۋدى سۇرادى. سوتتالۋشىلار كىنالارىن مويىنداماي، اقتاۋدى سۇرادى.
سونىمەن قاتار، سوتتا اتاپ وتىلگەندەي، ەكسترەميستىك قىلمىستار ساناتىنا جاتقىزىلعان بۇل ارەكەت ءۇشىن بەس جىلدان ون جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان. ال قىلمىستىق كودەكستىڭ 63-بابىنىڭ 6-بولىگىنە سايكەس، ەكسترەميستىك قىلمىس جاساعانى ءۇشىن شارتتى جازا قولدانىلمايدى.
ىستە سوتتالۋشىلاردىڭ قىلمىستىق جاۋاپتىلىعى مەن جازاسىن اۋىرلاتاتىن دا، جەڭىلدەتەتىن دە ءمان-جايلار بولعان جوق.
"جوعارىدا ايتىلعاندارعا بايلانىستى، سوت اۋىر ەكسترەميستىك قىلمىس جاساعانى ءۇشىن كىنالى دەپ تانىلعان سوتتالۋشىلارعا ەڭ تومەنگى جازانى بەلگىلەدى. سوتتالۋشىلاردىڭ ارقايسىسىنا بەس جىلعا باس بوستاندىعىنان ايىرۋ جازاسى تاعايىندالىپ، قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋگە سوتتالدى”، – دەپ قورىتىندىلادى سوت.
”ادىرنا” ۇلتتىق پورتالى
