ابحازيانىڭ استاناسى سۋحۋميدە جاڭا ينۆەستيتسيالىق كەلىسىمگە قارسى نارازىلىقتار جالعاسۋدا، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
16 قاراشادا شەرۋشىلەر پارلامەنت عيماراتىن باسىپ الىپ، سىرتقا شىعۋدان باس تارتتى. بۇعان دەيىن پرەزيدەنت اسلان بجانيا نارازىلىق بىلدىرۋشىلەر ۇكىمەتتىك كەشەننەن شىققان جاعدايدا وتستاۆكاعا كەتەتىنىن مالىمدەگەن ەدى.
«ولار عيماراتتان شىققاننان كەيىن، مەن وتستاۆكا تۋرالى ءوتىنىش جازامىن. جاڭا سايلاۋدا كىم قانشالىقتى قولداۋعا يە بولاتىنىن كورەمىز»، – دەدى بجانيا. قازىرگى ۋاقىتتا ول ءوزىنىڭ تۋعان اۋىلى تامىشتا ەكەنى بەلگىلى.
وپپوزيتسيانىڭ كوورديناتسيالىق كەڭەسى سەنبى كۇنى حالىقتى جەرگىلىكتى ۋاقىت بويىنشا 14:00-دە پارلامەنت الدىنا جينالىپ، پرەزيدەنتتىڭ قىزمەتتەن كەتۋىن تالاپ ەتۋگە شاقىردى.
15 قاراشادا ابحازيا پارلامەنتى رەسەيمەن جاڭا ينۆەستيتسيالىق كەلىسىمدى تالقىلاۋعا ءتيىس بولعان ەدى. الايدا بۇل قۇجات جەرگىلىكتى حالىق اراسىندا الاڭداۋشىلىق تۋعىزدى. ولار كەلىسىمنىڭ رەسەي بيزنەسىنىڭ كەڭەيۋىنە جول اشىپ، ابحازيالىقتاردىڭ تۋريزم سالاسىنان تابىس تابۋىنا كەدەرگى كەلتىرۋى مۇمكىن ەكەنىن ايتتى.
نارازىلىقتار 12 قاراشادا بەس وپپوزيتسيا وكىلىنىڭ ۇستالۋىنان باستالدى جانە ءبىر اپتا بويى جالعاستى. سەنبى كۇنى نارازىلىق بىلدىرۋشىلەر مالىمدەمە جاساپ، ۇكىمەت عيماراتتارىن باسىپ الۋ ارەكەتتەرىنىڭ رەسەيمەن تىعىز قارىم-قاتىناسقا قارسى باعىتتالماعانىن ايتتى. دەگەنمەن، ولار پرەزيدەنتتى وسى بايلانىستاردى جەكە مۇددەسىنە پايدالانىپ، رەجيمىن كۇشەيتۋ ءۇشىن مانيپۋلياتسيا جاسادى دەپ ايىپتاۋدا.
رەسەيدىڭ سىرتقى ىستەر مينيسترلىگى ابحازياداعى وقيعالاردى «داعدارىس جاعدايى» دەپ اتاپ، الاڭداۋشىلىق ءبىلدىردى. سونىمەن قاتار، رەسەي ازاماتتارىن بۇل ايماققا ساپار شەكپەۋگە شاقىردى.
ايتا كەتسەك، رەسەي ابحازيا مەن وڭتۇستىك وسەتيانىڭ تاۋەلسىزدىگىن 2008 جىلى گرۋزيامەن بولعان بەس كۇندىك سوعىستان كەيىن مويىنداعان بولاتىن. الايدا حالىقارالىق قاۋىمداستىق بۇل ايماقتاردى گرۋزيانىڭ ءبىر بولىگى دەپ ەسەپتەيدى.
