رۋمىنيا پارلامەنتىنىڭ تومەنگى پالاتاسى مولدوۆا رەسپۋبليكاسىمەن بىرىگۋگە قاتىستى زاڭ جوباسىن ماقۇلدادى. باستامانى «SOS Romania» پارتياسى ۇسىنعان، دەپ حابارلايدى "ادىرنا".
جەرگىلىكتى باق مالىمەتىنشە، قۇجات ء«ۇنسىز قابىلداۋ» ءراسىمى ارقىلى وتكەن. ياعني، زاڭ جوباسى 45 كۇن ىشىندە پلەنارلىق وتىرىستا قارالماي ءارى كەرى قايتارىلماسا، اۆتوماتتى تۇردە ماقۇلدانعان بولىپ ەسەپتەلەدى.
زاڭ جوباسىندا رۋمىنيا پارلامەنتىنە مولدوۆامەن بىرىگۋ تۋرالى شەشىم قابىلداۋ جانە ۇكىمەتكە كيشينەۆ بيلىگىمەن وسى ماسەلە بويىنشا شۇعىل كەلىسسوزدەر جۇرگىزۋدى باستاۋ تاپسىرماسى قاراستىرىلعان.
الايدا باستاما زاڭ كۇشىنە ەنۋى ءۇشىن ونى ەندى رۋمىنيا سەناتى دا ماقۇلداۋى قاجەت.
بۇعان دەيىن مولدوۆا پرەزيدەنتى مايا ساندۋ رۋمىنيامەن بىرىگۋ ماسەلەسىنە قاتىستى ءوز ۇستانىمىن اشىق بىلدىرگەن بولاتىن. ول بيىل قاڭتاردا بريتاندىق The Rest is Politics پودكاستىنا بەرگەن سۇحباتىندا، ەگەر بۇل ماسەلە بويىنشا رەفەرەندۋم وتكىزىلسە، رۋمىنيامەن بىرىگۋدى قولداپ داۋىس بەرەتىنىن ايتقان.
ساندۋدىڭ پىكىرىنشە، قازىرگى گەوساياسي جاعدايدا مولدوۆا سياقتى شاعىن مەملەكەتكە تاۋەلسىزدىگىن ساقتاي وتىرىپ، رەسەيدىڭ ىقپالىنا قارسى تۇرۋ بارعان سايىن قيىنداپ كەلەدى.
سوڭعى جىلدارى مولدوۆادا رۋمىنيامەن بىرىگۋدى قولدايتىنداردىڭ سانى ارتىپ كەلەدى. بيىل ناۋرىزدا جۇرگىزىلگەن ساۋالناما ناتيجەسىنە سايكەس، ازاماتتاردىڭ 42 پايىزى بۇل باستامانى قولداسا، 47 پايىزى قارسى ەكەنىن بىلدىرگەن.
ال رۋمىنيادا قوعامدىق قولداۋ الدەقايدا جوعارى. ساۋالناماعا سايكەس، تۇرعىنداردىڭ شامامەن 72 پايىزى ەكى ەلدىڭ بىرىگۋىن قولدايدى.
قازىرگى تاڭدا مولدوۆا حالقىنىڭ ۇشتەن بىرىنە جۋىعى، شامامەن 2,4 ميلليون ادامنىڭ ىشىندە، رۋمىنيا ازاماتتىعىنا يە. سونىمەن قاتار رۋمىنيا مولدوۆانىڭ ەڭ ءىرى ساۋدا سەرىكتەسىنە اينالىپ، ەلدىڭ رەسەي ەنەرگەتيكالىق رەسۋرستارىنا تاۋەلدىلىگىن ازايتۋ جانە ەۋروپالىق ەنەرگەتيكالىق جۇيەلەرگە قوسىلۋىنا قولداۋ كورسەتىپ كەلەدى.
