29 جەلتوقساندا تاشكەنت - استانا باعىتىندا ۇشىپ كەلە جاتقان ۇشاق بورتىندا جولاۋشىنىڭ جاعدايى ناشارلاپ، پاۆلودارلىق دارىگەر ايەلدىڭ جانىنان ءبىر ساعاتتان استام ۋاقىت مەديتسينالىق كومەك كورسەتكەن. بۇل تۋرالى دەنساۋلىق ساقتاۋ مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ۇشۋ كەزىندە جولاۋشىلاردىڭ ءبىرى اۋىرىپ قالعان. بورتتا پاۆلودارلىق دارىگەر-انەستەزيولوگ مۇرات سۇلەيمەنوۆ بولدى، ول جەدەل كومەككە كەلىپ، جولاۋشىنىڭ جاعدايىن باقىلاپ وتىردى.
ءبىر ساعاتتان استام ۋاقىت بويى دارىگەر ايەلدىڭ جانىندا بولىپ، قاجەتتى كومەك كورسەتتى.
«ەكيپاجدىڭ ۇيلەسىمدى جۇمىسى مەن مۇرات سۇلەيمەنوۆتىڭ كاسىبيلىگىنىڭ ارقاسىندا ايەلدىڭ جاعدايى ايتارلىقتاي جاقسارىپ، ول جولدى جەڭىل ءارى سەنىمدى تۇردە جالعاستىرا الدى»، دەلىنگەن حابارلامادا.
مۇرات سۇلەيمەنوۆ پاۆلودار تەمىرجول اۋرۋحاناسىندا انەستەزيولوگ بولىپ جۇمىس ىستەيدى، جوعارعى ساناتتاعى بىلىكتى دارىگەردىڭ 28 جىل جۇمىس ءوتىلى بار.
