Azerbaijan Airlines اۋە كومپانياسىنىڭ ۇشاعى اپاتىنان قازا تاپقان 21 جولاۋشىنىڭ جانە ەكيپاجدىڭ ءۇش مۇشەسىنىڭ مايىتتەرى باكۋگە جەتكىزىلدى، دەپ حابارلايدى "ادىرنا" ۇلتتىق پورتالى Minval-گە سىلتەمە جاساپ.
اقتاۋ قالاسىنداعى اۋە اپاتى ناتيجەسىندە قازا تاپقان قۇربانداردىڭ مايىتتەرى ازەربايجان دەنساۋلىق ساقتاۋ مينيسترلىگىنىڭ سۋدمەدەكسپەرتيزا جانە پاتولوگيالىق اناتوميا بىرلەستىگىنە ءتيىستى ساراپتاما جۇرگىزۋ ءۇشىن جەتكىزىلدى.
مەديا مالىمەتتەرى بويىنشا، ياسامال اۋداندىق پاتولوگيالىق اناتوميا بيۋروسىندا Azerbaijan Airlines ۇشاعىنىڭ اپاتىندا قازا تاپقان 13 ادامنىڭ مايىتتەرىنە قايتا ساراپتاما جۇرگىزىلگەن.
سونىمەن قاتار، اپات سالدارىنان قازا تاپقان كاپيتان يگور كشنياكيننىڭ ءمايىتى وتباسىنا سوت-مەديتسينالىق ساراپتاما جۇرگىزىلگەننەن كەيىن تابىستالاتىنى بەلگىلى بولدى.
بۇعان دەيىن، ۇشاق اپاتىنان امان قالعان 14 جولاۋشىنىڭ ازەربايجانعا جەتكىزىلگەنى تۋرالى جازعان ەدىك.
ەسكە سالا كەتەيىك، 25 جەلتوقسان كۇنى AZAL اۋە كومپانياسىنىڭ Embraer 190 ۇشاعى باكۋ–گروزنىي باعىتىندا ۇشىپ بارا جاتىپ، اقتاۋ اۋەجايىنان 3 شاقىرىم جەردە اپاتقا ۇشىراعان ەدى. ۇشاق بورتىندا 67 ادام بولعان. ونىڭ 62-ءسى جولاۋشى جانە بەسەۋى ەكيپاج مۇشەسى. ولاردىڭ 38-ءى قازا تاۋىپ، 29 ادام اۋرۋحاناعا جەتكىزىلدى. ۇشاق ەكيپاجىنان 2 ادام ءتىرى قالدى.
