بۇگىن جەزقازعان جانە ساتباەۆ قالالارىندا 320 ورىندىق جاڭا بالاباقشالار اشىلىپ، ايماقتاعى مەكتەپكە دەيىنگى ءبىلىم بەرۋ ساپاسىن ارتتىرۋ باعىتىندا ماڭىزدى قادام جاسالدى. بۇل بالاباقشالار زاماناۋي ستاندارتتارعا ساي جابدىقتالعان جانە بالالاردىڭ قاۋىپسىز ءارى قولايلى ورتادا تاربيەلەنۋىنە مۇمكىندىك بەرەدى.
اشىلۋ سالتاناتىنا ۇلىتاۋ وبلىسىنىڭ اكىمى داستان رىسپەكوۆ، وبلىستىق ءماسليحاتتىڭ توراعاسى باۋىرجان شىڭعىسوۆ، قر سىبايلاس جەمقورلىققا قارسى ءىس-قيمىل اگەنتتىگىنىڭ ۇلىتاۋ وبلىسى بويىنشا دەپارتامەنتىنىڭ باسشىسى ەرلان جولدىباەۆ جانە ۇستازدار مەن اتا-انالار قاتىستى. ءوڭىر باسشىسى اتقارىلىپ جاتقان يگى جۇمىستاردى ۇلى اكادەميكتىڭ 125 جىلدىعىندا ورىن العان ءساتتى قادامداردىڭ ءبىرى ەكەنىن اتاپ ءوتتى.
سونىمەن قاتار كەنشىلەر قالاسىندا كوپتەن كۇتكەن وقۋشىلار سارايىنىڭ اشىلۋ سالتاناتى ءوتتى. بالالار مەن جاسوسپىرىمدەردىڭ شىعارماشىلىق قابىلەتتەرىن دامىتۋعا ارنالعان ورتالىقتا قازىردىڭ وزىندە 1000-نان استام وقۋشى ۇيىرمەگە جازىلعان. بۇل ساراي بالالاردىڭ عىلىم، ونەر، سپورت جانە زاماناۋي تەحنولوگيالاردى مەڭگەرۋىنە جول اشاتىن جاڭا مۇمكىندىكتەردى ۇسىنادى.
سالتاناتتى راسىمنەن كەيىن ۇلىتاۋ وبلىسىنىڭ اكىمى ساتباەۆ قالاسىندا «قازاقمىس» كورپوراتسياسىمەن مەموراندۋم اياسىندا كۇردەلى جوندەۋدەن وتكەن «اقبوتا» بالاباقشاسىنىڭ جۇمىس بارىسىن قاداعالادى. بوبەكجاي 60 جىلعا جۋىق ۋاقىتتان كەيىن تۇڭعىش رەت تولىقتاي جاڭارتىلدى.
سونىمەن قاتار بۇگىن ۇلتتىق جوبا اياسىندا ۇلىتاۋ وبلىسىندا تۇڭعىش «جايلى مەكتەپتىڭ» اشىلۋ سالتاناتى ءوتتى. 300 ورىندىق ءبىلىم وشاعى قابانباي باتىر شاعىناۋدانىندا ورنالاسقان. ءوڭىر باسشىسى شاعىناۋدان وقۋشىلارىنىڭ ەندى جەزقازعان قالاسىنا قاتىناۋعا ءماجبۇر بولمايتىندىعىن اتاپ ءوتىپ، ءبىلىم الۋشىلارعا ساتتىلىك تىلەدى. ەكى قاباتتى كەڭ عيماراتتا زاماناۋي سىنىپتار، زەرتحانالار، سپورت جانە ونەر زالدارى قاراستىرىلعان، سونىمەن قاتار وقىتۋ پروتسەسىنە زاماناۋي تسيفرلىق تەحنولوگيالار ەنگىزىلگەن.
