10 جەلتوقسان كۇنى الماتى قالاسى قوعامدىق دامۋ باسقارماسىنىڭ قولداۋىمەن Alatau Creative Hub يننوۆاتسيالىق مادەني ورتالىعىندا «ادام ساۋداسى قۇرباندارىنا كومەك كورسەتۋدەگى وزەكتى ماسەلەلەر» اتتى جوبانىڭ قورىتىندى دوڭگەلەك ۇستەلى ءوتتى.
ءىس-شاراعا مەملەكەتتىك ورگاندار، قۇقىق قورعاۋ ۇيىمدارى، پوليتسيا دەپارتامەنتى، مەديتسينا قىزمەتكەرلەرى، پسيحولوگتار مەن پەداگوگتار قاتىستى.
دوڭگەلەك ۇستەلدىڭ ماقساتى — ادام ساۋداسىنا قارسى كۇرەس جولىندا اتقارىلىپ جاتقان جۇمىستاردى تالقىلاپ، زاڭنامالىق جانە پراكتيكالىق تۇرعىدا تۋىنداپ وتىرعان ماسەلەلەردى انىقتاۋ، سونداي-اق ادام ساۋداسىنىڭ قۇرباندارىنا ءتيىمدى كومەك كورسەتۋ جولدارىن قاراستىرۋ بولدى.
جيىندى الماتى قالاسى اكىمدىگىنىڭ قوعامدىق دامۋ باسقارماسى ازاماتتىق باسقارمااردى قولداۋ ءبولىمىنىڭ باس مامانى باۋىرجان امانتايۇلى اشىپ، “ادام ساۋداسى قۇرباندارىنا كومەك كورسەتۋدەگى وزەكتى ماسەلەلەر” اتتى جوبا اياسىندا جۇمىس ىستەگەن ماماندارعا العىسىن ءبىلدىردى.
ءىس-شارا بارىسىندا بىرنەشە نەگىزگى ماسەلەلەر كوتەرىلدى.
الدىمەن، الماتى قالاسى دەپارتامەنتىنىڭ پوليتسياسى جادىرا قاڭتارباەۆا قۇقىق قورعاۋ ورگاندارىنىڭ ۇيلەسىمدىلىگى مەن ۇيلەستىرۋ ماسەلەلەرى تۋرالى ايتتى. ونىڭ ايتۋىنشا، قۇقىق قورعاۋشىلار مەن ازاماتتىق قوعام اراسىنداعى ءوزارا ارەكەتتەستىك كوبىنەسە جەتىسپەۋشىلىككە ۇشىراۋدا. بۇل قۇرباندارعا ۋاقىتىندا كومەك كورسەتۋگە كەدەرگى كەلتىرەدى.
ء”بىز بۇل جوبا اياسىندا اكىمشىلىكپەن جانە بىرنەشە ماماندارمەن بىرىگىپ جۇمىس ىستەي وتىرا، ادام ساۋدسى قۇرباندارىن انىقتادىق. ساۋنا، مونشا سىندى جەرلەردى تەكسەرە كەلە، كەيبىر ءماجبۇرلى تۇردە قىزمەت ەتۋشىلەردىڭ بار ەكەنىن بىلدىك. بۇل ءىس بويىنشا جۇمىستار جۇرگىزىلۋدە. سونىمەن قاتار، ادام ساۋداسى ماسەلەسىنە بەي-جاي قاراماۋدى سۇرايمىن. بارلىعىمىز بىرىگىپ ءجۇمىس ىستەۋىمىز قاجەت”، دەدى جادىرا قاڭتارباەۆا.
سونىمەن قاتار، شارا بارىسىندا ادام ساۋداسى قۇرباندارىنا پسيحلوگيالىق كومەكتىڭ قاجەتتىلىگى تۋرالى ايتىلدى. № 29 قالالىق ەمحانا پسيحولوگى زوحيدا توروكانوۆنانىڭ ايتۋىنشا، ادام ساۋداسى قۇرباندارى كوبىنەسە جاراقاتتار مەن پسيحولوگيالىق پروبلەمالارعا تاپ بولادى، ولارعا كاسىبي پسيحولوگتار مەن الەۋمەتتىك قىزمەتكەرلەردىڭ قولداۋى قاجەت.
ء”بىز وسى جوبا اياسىندا ادام ساۋداسى قۇرباندارىمەن بايلانىسىپ، جۇمىس ىستەدىك. بۇرىن مۇنداي ماسەلەگە تاپ بولاتىن ادامدار از كورىنەتىن. دەگەنمەن ەلىمىزدە ادام ساۋداسىنىڭ قۇرباندارى كوپ ەكەن. ولارعا الدىمەن، پسيحولوگيالىق كومەك كورسەتۋىمىز قاجەت. ءبىز جوبا اياسىندا حالىققا اقپاراتتاندىرۋ جۇرگىزدىك. ادام ساۋداسىنا كۋا بولعان جاعدايدا نەمەسە قۇربانى بولعاندا نە ىستەۋ كەرەك، قايدا جۇگىنۋ كەرەگىن ايتتىق. بۇل ماسەلە جاي قاراۋدى قاجەت ەتپەيدى”، دەدى پسيحولوگ مامان.
جوبا اياسىندا اتقارىلعان ەڭ ماڭىزدى ىستەردىڭ ءبىرى - ادام ساۋداسى تۋرالى ءبىلىم مەن اقپاراتتى حالىق اراسىندا كەڭىنەن تاراتۋ. سەبەبى بۇل قىلمىس كوبىنەسە جاسىرىن تۇردە جۇرەدى جانە قوعامنىڭ حاباردارلىعى ماسەلەسى وزەكتى بولىپ وتىر.
سونداي-اق، الماتى قالاسى الاتاۋ اۋداندىق مەديتسينالىق بىرلەستىگىنىڭ باسشىسى اقميرا ماحامبەتقاليقىزى ادام ساۋداسى قۇرباندارىنا پسيحولوگيالىق كومەكپەن قاتار، مەديتسينالىق كومەكتىڭ اسا قاجەت ەكەنىن ايتتى. ونىڭ ايتۋىنشا، ادام ساۋداسىنىڭ قۇرباندارى كوپ جاعدايا جابىلىپ، مەديتسينالىق كومەككە جۇگىنبەي قالادى. سوندىقتان وسىنداي جوبانىڭ جۇرگىزىلۋى ماڭىزدى.
ءىس-شارا سوڭىندا قاتىسۋشىلار بىرىگىپ، ادام ساۋداسىنىڭ قۇرباندارىنا كومەك كورسەتۋدىڭ جاڭا تاسىلدەرى مەن ءتيىمدى ادىستەرىن انىقتاۋ ءۇشىن ۇسىنىستار ازىرلەۋدى ۇسىندى. كەلەشەكتە وسىنداي دوڭگەلەك ۇستەلدەردى ءجيى وتكىزىپ، قوعام مەن قۇقىق قورعاۋ ورگاندارىنىڭ كۇش بىرىكتىرۋى ماڭىزدى ەكەندىگى اتاپ ءوتىلدى.
