قاراعاندى وبلىسىندا اگروتەحنولوگيالىق حاب قۇرىلادى – مۇندا وزىق عىلىمي ازىرلەمەلەر، ءبىلىم بەرۋ باعدارلامالارى جانە بيزنەس-پلاتفورمالار شوعىرلانباق. ول اۋىل شارۋاشىلىعىنىڭ يننوۆاتسيالىق وسۋىنە، ونىمدىلىك پەن ءونىم ساپاسىن ارتتىرۋعا، سونداي-اق ءبىلىم مەن تەحنولوگيالاردى ەكسپورتتاۋ الاڭىنا اينالۋى ءتيىس.
وساكاروۆ اۋدانىندا سىيىمدىلىعى 28 مىڭ توننا بولاتىن زاماناۋي ەلەۆاتور سالۋ جوباسى جۇزەگە اسىرىلۋدا. بۇل جاقىن ماڭداعى اۋىل شارۋاشىلىعى قۇرىلىمدارىنىڭ ءونىمدى تاسىمالداۋ جانە ساقتاۋ شىعىندارىن ازايتۋعا مۇمكىندىك بەرەدى.
قاراعاندىدا وتكەن جيىندا مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋى تالقىلاندى. وندا پرەزيدەنت جۇكتەگەن مىندەتتەردىڭ قاراعاندى وبلىسىندا جۇزەگە اسىرىلۋ بارىسى قارالدى.
قازاقستان حالقىنا جولداۋىندا قاسىم-جومارت توقاەۆ ەلدىڭ اگروونەركاسىپ كەشەنىن ترانسفورماتسيالاۋ جونىندەگى ناقتى مىندەتتەردى ايقىندادى. باسىمدىقتار قاتارىندا – اگرارلىق عىلىمدى جاڭعىرتۋ، اگروتەحنولوگيالىق حابتار قۇرۋ، ەكسپورتقا باعىتتالعان ءوندىرىستى دامىتۋ، ازىق-تۇلىك قاۋىپسىزدىگىن قامتاماسىز ەتۋ، سالانى تسيفرلاندىرۋ جانە اۋىل شارۋاشىلىعى كووپەراتسياسىن قولداۋ بار.
– ءبىزدىڭ ءوڭىر اگروونەركاسىپ سەكتورى دامىعان ايماق. بۇگىندە اۋىل شارۋاشىلىعى تاۋارىن وندىرۋشىلەر ەگىس القاپتارىن دا، ءىرى قارا مال باسىن دا ەداۋىر كوبەيتتى. ءبىز 19 الەۋمەتتىك ماڭىزى بار ازىق-تۇلىك تاۋارىنىڭ 14-ءىن وندىرەمىز، ال 6 ءونىم ءتۇرى بويىنشا تولىق ءوزىن-ءوزى قامتاماسىز ەتتىك، – دەدى قاراعاندى وبلىسىنىڭ اكىمى ەرماعانبەت بولەكپاەۆ.
وڭىردە اۋىل شارۋاشىلىعى كووپەراتسياسى دامىپ، ينفراقۇرىلىم جاڭارتىلۋدا، ەگىستىك كولەمى كەڭەيۋدە. وبلىستا جالپى قۇنى 23 ميلليارد تەڭگەدەن اساتىن 30 جوبا جۇزەگە اسىرىلىپ جاتىر. «اۋىل اماناتى» باعدارلاماسى اياسىندا 480-نەن استام شاعىن نەسيە بەرىلىپ، 816 جۇمىس ورنى اشىلدى، ونداعان كووپەراتيۆ قۇرىلۋدا.
اۋىل شارۋاشىلىعى ونىمدەرىن تەرەڭ وڭدەۋگە، كليماتقا ءتوزىمدى تەحنولوگيالاردى ەنگىزۋگە، اگرارلىق عىلىمدى دامىتۋعا، كادر دايارلاۋعا جانە عىلىم، ءبىلىم مەن ءوندىرىستى تىكەلەي بىرىكتىرۋ تەتىكتەرىن قۇرۋعا ەرەكشە كوڭىل بولىنۋدە.
– بيىل 1100 باسقا ارنالعان، جىلىنا 9 مىڭ توننا ءسۇت وندىرەتىن تاۋارلى-ءسۇت فەرماسى ىسكە قوسىلدى. سونىمەن قاتار جىلىنا 200 توننا ءسۇت ونىمدەرىن شىعاراتىن زاۋىت پايدالانۋعا بەرىلدى. قۋاتتىلىعى جىلىنا 55 مىڭ توننا بولاتىن، 6 مىڭ باسقا ارنالعان ءىرى ءسۇت فەرماسى سالىنىپ جاتىر. بۇل جوبالاردىڭ جۇزەگە اسۋى جاڭا جۇمىس ورىندارىن قۇرىپ، ءوڭىردىڭ ازىق-تۇلىكپەن قامتاماسىز ەتىلۋ دەڭگەيىن ارتتىرادى. وبلىستا قايتا وڭدەۋ ونەركاسىبى دە بەلسەندى دامۋدا: ەت، ءسۇت، ۇن تارتۋ جانە نان-توقاش وندىرىستەرىن قوسا العاندا، 207 كاسىپورىن جۇمىس ىستەيدى. مۇنىڭ ءبارى وتاندىق قانا ەمەس، شەتەلدىك ينۆەستورلاردى دا تارتىپ وتىر، – دەپ اتاپ ءوتتى وبلىس اكىمىنىڭ ورىنباسارى رۋسلان كەنجەبەكوۆ.
تەحنيكالىق قايتا جاراقتاندىرۋعا دا ايرىقشا نازار اۋدارىلۋدا: اۋىل شارۋاشىلىعى تەحنيكاسى پاركى جاڭارتىلىپ، ليزينگتىك قارجىلاندىرۋ دامۋدا، جانار-جاعارماي، تۇقىم، تىڭايتقىش پەن اسىل تۇقىمدى مال شىعىندارى سۋبسيديالانۋدا. دالمە-ءدال ەگىنشىلىك ەلەمەنتتەرى، تسيفرلىق تەحنولوگيالار جانە اگرارلاردى وقىتۋدىڭ زاماناۋي تاسىلدەرى ەنگىزىلۋدە.
وڭىردە ەپيزووتيكالىق جاعدايدى قامتاماسىز ەتۋ ءۇشىن كەشەندى شارالار جۇزەگە اسىرىلۋدا. ونىڭ ىشىندە الدىن الۋ، دياگنوستيكا جانە ينفراقۇرىلىمدى دامىتۋ باعىتتارى بار. مودۋلدىك ۆەتەرينارلىق پۋنكتتەر سالىنۋدا.
– جۇيەلى ءتاسىلدىڭ ارقاسىندا قاراعاندى وبلىسى مەملەكەت باسشىسى جۇكتەگەن اوك-ءتى دامىتۋ، ازىق-تۇلىك، ۆەتەرينارلىق جانە ەكولوگيالىق قاۋىپسىزدىكتى ارتتىرۋ جانە ەل ەكونوميكاسىن نىعايتۋ جونىندەگى ستراتەگيالىق مىندەتتەردى ورىنداۋى ءتيىس، – دەپ تۇيىندەدى رۋسلان كەنجەبەكوۆ.
