الەمگە تانىمال قازاق ءانشى ديماش قۇدايبەرگەن پروديۋسەرلىك ەتەتىن Voice Beyond Horizon مۋزىكالىق رەاليتي-شوۋى ينتەرنەت پلاتفورمالارىندا 1,5 ملرد-تان استام قارالىم جينادى. بۇل تۋرالى ونەر يەسىنىڭ كومانداسى مالىمدەدى, دەپ حابارلايدى "ادىرنا".
جاريالانعان دەرەكتەرگە سايكەس، قارالىمدار سانى 1,59 ملرد-قا جەتكەن، ال باعدارلاماعا قولداۋ كورسەتكەندەر يندەكسى 100%-دى قۇراعان (CMMR).
سونىمەن قاتار، ديماشتىڭ شوۋى Dengta, Vlinkage جانە Endata پلاتفورمالارىندا رەيتينگتە كوش باستاپ تۇر، ال كەيبىر قاتىسۋشىلاردىڭ ونەرى 1 ملن-نان استام قارالىم جيناعان.
جوبا اۆتورلارى باعدارلامانىڭ قىتايدىڭ ايماقتىق سپۋتنيكتىك ارنالارىندا تەلەۆيزيالىق رەيتينگتە تۇراقتى تۇردە ءبىرىنشى ورىندا ەكەنىن اتاپ ءوتتى. سونىمەن قاتار، شوۋ حالىقارالىق الەۋمەتتىك جەلىلەردە، سونىڭ ىشىندە YouTube پەن TikTok پلاتفورمالارىندا كەڭىنەن تارالۋدا.
بۇدان بولەك، جوبا تۋرالى 500-دەن استام ماقالا مەن ۇسىنىستار جاريالاندى. ولاردىڭ ىشىندە قىتايلىق مەملەكەتتىك باق تا بار، ال شوۋ 300-دەن استام رەت تانىمال تاقىرىپتار تىزىمىنە ەنگەن.
ايتا كەتەيىك، Voice Beyond Horizon – ديماش قۇدايبەرگەننىڭ حالىقارالىق پروديۋسەرلىك جوباسى، 2026 جىلى قىتايدىڭ Hunan Broadcasting System مەديا توبىنىڭ قاتىسۋىمەن ىسكە قوسىلعان. جوبانىڭ اقپان ايىندا تۇساۋكەسەرى ءبىر تاۋلىكتە 102 ملن كورەرمەن جيناپ، قىتاي رەيتينگىنىڭ كوشىن باستاعان بولاتىن.
