ۇلەسكەرلەردى زار قاقساتىپ، پاتەرگە سالعان اقشاسىن وڭدى سولدى شاشقان قۇرىلىس كومپانيالارىنىڭ كرىشاسى كىم؟ نە العان ءۇيى جوق، نە سالعان اقشاسى جوق زارلاپ قالعان حالىقتىڭ وبالى كىمگە؟ قالاي عانا جۇرتتىڭ باسپاناعا دەپ سالعان اقشاسىن جەكە باس پايداسىنا جاراتادى؟ ميللياردتاردى قىلعىتقان، بيىل 66 جاسقا كەلگەن يگور جاكوۆ نە سەبەپتى 6 جىلعا عانا سوتتالدى؟
"اق قاشىپ، قىزىل قۋىپ" دەگەندەي الاعاي دا بۇلاعاي 1993 جىلى يگور الەكساندرۇلى «FONT» جشس قۇرىپ باستادى. كەيىننەن بۇل جشس-نىڭ قۇرىلتايشىلارى «Building Group» جشس جانە يگور جاكوۆ بولدى. ناقتىراق ايتساق 1997 جىلدان بەرى وسى كومپانيانى باسقارىپ كەلەدى.
09.06.2005 «Building Service» جشس بولىپ قۇرىلىپ، تىركەلەدى. قۇرىلتايشىسى جاكوۆ پەن «FONT» جشس. قالاي قالاي قۇبىلادى،ءا؟ ءۇش كومپانيا دا ءبىر-بىرىمەن تىعىز بايلانىستى، ۇشەۋى دە جاكوۆقا قارايدى.
ەڭ قىزىعى، «Building Service» جشس مەنەدجەرلەرى بولىپ:
2005-2008 جىلدارى - نۇرعازيەۆ مۇرات ارشانۇلى، 2008-2011 جىلدارى - داۋرەنبەكوۆ ۆالەري احاتوۆيچ، 2011-2013 جىلدارى - جاكوۆ يگور الەكساندروۆيچ، 2013 جىلدان قازىرگى ۋاقىتقا دەيىن قايتادان - نۇرعازيەۆ مۇرات ارشانۇلى.
وسى كومپانيانى قۇرىپ العان جاكوۆ نە ىستەيدى؟ دۇرىس ايتاسىز، حالىقتى لاقتىرۋدى باستايدى. ادامدار توبىمەن الدىن-الا ءسوز بايلاسۋ ارقىلى قىلمىستىق جوسپار قۇرىپ، وزىنە سەنىپ تاپسىرىلعان اقشانى يەمدەنەدى. شوت-فاكتۋرالاردى، اۋدارىمداردى قابىلداۋ اكتىلەرىن بەرۋ ارقىلى سەرىكتەستىكتىڭ بۋحگالتەرلەرىنە نۇسقاۋلار بەرىپ، كاسسالىق ەسەپ ايىرىسۋ وپەراتسيالارىنا تۇزەتۋلەر ەنگىزىپ، ەسەپكە الۋ قۇجاتتارىنىڭ تەلنۇسقاسىن بەرىپ، «تاۋ-كوكتەم» تۇرعىن ءۇي كەشەنىن سالۋعا ارنالعان قاراجاتتى قولما-قول اقشاعا اينالدىرادى دا وزىنە الىپ الادى.
«تاۋ-كوكتەم» تۇرعىن ءۇي كەشەنىنەن ءۇي الامىز دەپ، دامەلەرى دامبالداي بولعان ۇلەسكەرلەر «Building Service» جشس-ءنىڭ كاسساسىنا اقشا سالعان. ول اقشانى جاكوۆتىڭ قالتاسىنا ءوز قولدارىمەن سالعاندارىن سەزبەيدى دە.
ال، جاكوۆ قايتەدى؟ ول Aston Martin, Maserati, Porsche Cayenne, Mercedes Benz, Lexus سەكىلدى قىمبات جاڭا كولىكتەر، Ulysse Nardinدەگى شىڭعىسحان سەكىلدى قىمبات ساعاتتار مەن Vertu سياقتى قىمبات تەلەفوندار الادى.
2004 جىلعى 8 ماۋسىمدا «Building Group» جشس مەن «Grand Hotel Tien-Shan» جشس اراسىندا «Grand Hotel Tien-Shan» قوناق ءۇي كەشەنىن قايتا قۇرۋ جۇمىستارىن جۇرگىزۋگە كەلىسىم-شارت تۇزىلەدى.
2006 جىلى جاكوۆ سارسەنوۆتەرمەن جوعارىداعى قوناقۇيدى قالپىنا كەلتىرۋ ءۇشىن جەكە قارىم-قاتىناسى نەگىزىندە ولارعا جالپى سوماسى 230 ميلليون تەڭگەدەن اساتىن (سول كەزدە شامامەن 2 ميلليون دوللار) 3 پاتەر تىركەيدى.
«بتا-ينۆەستسترويگرۋپپ» جشس-نىڭ سول كەزدەگى باسشىسى تيمۋر قوناقباەۆ «Building group» جشس-مەن «تاۋ-كوكتەم» تۇرعىن ءۇي كەشەنىنە بەتون قۇيۋ، تاكەلاجدىق جۇمىستار، تىرەكتەردى ورناتۋ جانە قاسبەتتىك قابىرعالاردى ارماتۋرامەن قاپتاۋ كىرپىشتەرىن قالاۋ جونىندە كەلىسىمگە قول قويادى.
ءدال وسى ۋاقىتتا ءدال وسى «بتا-ينۆەستسترويگرۋپپ» جشس تاپسىرىس بەرۋشى رەتىندە «Building Group» جشس-مەن الما-اراسان شاتقالىندا كوك-شوقتى اۋىلىندا قوناق ءۇي سالۋعا كەلىسىم-شارت جاساسقان.
«بتا-ينۆەسترويگرۋپپ» جشس 602 ميلليون تەڭگەگە نەسيە الىپ، ول اقشا قوناقباەۆ پەن جاكوۆتىڭ ەسەپ-شوتىنا اۋدارىلادى.
جاكوۆ قوناقباەۆقا اتقارعان جۇمىستارى ءۇشىن 2005 جىلى 15 ميلليون تەڭگە تۇراتىن (باستاپقى قۇنى 500 000 دوللاردان استام) Porsche Cayenne Turbo, GT750 AERO III Gembala كولىگىن سىيلايدى.
«بتا-ينۆەستسترويگرۋپپ» جشس-ءنىڭ «نۇربانك» اق الدىندا 4 982 752 230 تەڭگە كرەديتورلىق بەرەشەگى بار، ول 4-ءشى كەزەككە 916 613 149 تەڭگە جانە كرەديتورلار تالاپتارى ءتىزىلىمىنىڭ 5-ءشى كەزەكتەگى 413 069 تەڭگە سوماسىنا ەنگىزىلگەن.
وسى ءىس ماتەريالدارىنا سايكەس، سول كەزدە ەگوۆتىڭ انىقتاماسىنا سايكەس، يگور الەكساندروۆيچ جاكوۆ «بتا-ينۆەستسترويگرۋپپ» جشس باسشىسى، قۇرىلتايشىسى تيمۋر اسىلبەكۇلى قوناقباەۆ ەكەنى انىقتالدى.
وسىلايشا، زاڭدى كۇشىنە ەنگەن سوت شەشىمدەرىمەن «بتا-ينۆەستسترويگرۋپپ» جشس-ءنىڭ «نۇربانك» اق الدىندا 21 ملرد تەڭگە قارىزى بار ەكەنى انىقتالىپ، 4 983 352 267 تەڭگە ءوندىرىلدى.
ءسويتىپ جالعاندى جالپاعىنان باسىپ، ميلليونداردى تيىن، ميللياردتاردى تەڭگە كورمەگەن جاكوۆ يگور الەكساندرۇلى ۇستالادى.
2020 جىلدىڭ 08 ماۋسىمىندا الماتى قالاسى مەدەۋ اۋداندىق №2 سوتى «Building Service» جشس بۇرىنعى قۇرىلىس سالۋشىسىنىڭ قۇرىلتايشىسى جاكوۆ يگورعا قاتىستى ۇكىم شىعارىپ، ول ۇلەسكەرلەردىڭ اقشاسىن يەمدەنۋ جانە جىمقىرۋ فاكتىلەرى بويىنشا كىنالى دەپ تانىلىپ، 2020 جىلدىڭ 1 قازانىندا 6 جىلعا سوتتالدى. اراعا 2-3 جىل سالىپ قايتادان ەركىندىككە شىعىپ الدى. براۆو!
قر ءىىم! قر باس پروكۋراتۋراسى!
مىناۋ نە ماسقارا؟ حالىقتىڭ بالا-شاعانىڭ اۋزىنان جىرىپ جيناعان ميللياردتارىن جەگەن جاكوۆ نەبارى 6 جىلعا سوتتالادى دا، 2-3 جىلدا شىعىپ الادى! مەملەكەتتىڭ ءوزى الاياقتىقتى زاڭداستىرىپ وتىرعان جوق پا؟ نەگە جاكوۆتىڭ جەگەنىن قۇستىرمايدى؟ قاراپايىم جۇرتتىڭ ايىپپۇلىن سوڭعى تيىنىنا دەيىن تولەتەسىڭدەر عوي. بۇنىڭ دا دامبالىنا دەيىن سىپىرىپ الىڭدار!
انشەيىندە تاۋىق ۇرلاعان كەدەيدى 6 جىلعا سوتتاپ، ونى مەرزىمى بىتپەي تۇرمەدەن شىعارمايسىڭدار! ميللياردتاردى قىلعىتقان جاكوۆ نەگە قۇسپاعان؟ نەگە 6 جىلعا عانا سوتتالىپ، مەرزىمىنىڭ جارتىسىنا جەتپەي شىعىپ العان؟ الدە، وعان تيىسۋگە جاكوۆتىڭ كوكەلەرىنەن قورقاسىڭدار ما؟
وڭعار قابدەن
P.S. اۆتوردىڭ پىكىرى رەداكتسيانىڭ كوزقاراسىن بىلدىرمەيدى
