ەلىمىزدە كاسىپكەرلىكتى دامىتۋ بويىنشا اۋقىمدى جۇمىستار اتقارىلىپ جاتىر. ونىڭ ىشىندە جاستاردىڭ ءوز كاسىبىن اشىپ، تابىس تابۋى وتە ماڭىزدى بولىپ وتىر.
وسى ماقساتتا تاراز قالاسىندا «باستا» بيزنەس-فورۋمى ءوتىپ، ءمان-ماعىناسى زور ءىس-شارا ۇيىمداستىرىلدى. ناقتىراق ايتساق، بولاشاق كاسىپكەرلەر ەلىمىزدەگى بەلگىلى جاس كاسىپكەرلەرمەن كەزدەسىپ، وزدەرىنىڭ تولعاندىرىپ جۇپگەن سۇراقتارىنا جاۋاپ الدى.
اتالمىش فورۋمعا «جاس كاسىپكەر» جوباسىنىڭ العاشقى تۇلەكتەرى قاتىسىپ، ءوز بيزنەسىن اشۋدى ارماندايتىن جاستارعا اقىل-كەڭەستەرىن ايتتى. ولار بيىل باستالعان «جاس كاسىپكەر» جوباسىنىڭ مول مۇمكىندىك بەرگەنىن جەتكىزدى.
«بۇگىنگى كۇنى «جاس كاسىپكەر» جوباسى بويىنشا تىڭداۋشىلاردىڭ ەكىنشى لەگىن وقىتۋ اياقتالدى. بارلىعى 1000 ادامدى قامتۋ جوسپارلانۋدا. وبلىس بويىنشا 10 وقۋ سىنىبى جۇمىس ىستەيدى. وقۋدى اياقتاعاننان كەيىن جاستار ءوز بيزنەسىنىڭ باسىندا گرانتتار نەمەسە جەڭىلدىكتى نەسيەلەر الا الادى. بۇگىنگى فورۋمدى ءبىز «جاس كاسىپكەر» جوباسىنىڭ تۇلەكتەرىن تەك ءوڭىردىڭ عانا ەمەس، ەلىمىزدىڭ دە جۇمىس ىستەپ تۇرعان كاسىپكەرلەرىمەن كەزدەسۋ ماقساتىندا ۇيىمداستىردىق»، – دەيدى وبلىستىق كاسىپكەرلەر پالاتاسىنىڭ ماماندارى.
«باستا» فورۋمى الاڭىندا ەركىن فورماتتا قاتىسۋشىلار جۇمىس ىستەپ تۇرعان كاسىپكەرلەردىڭ تاريحىن تىڭداپ، سپيكەرلەرگە تىكەلەي وزدەرىن قىزىقتىراتىن سۇراقتارىن جولدادى. سپيكەرلەر قاتارىندا كاسىبي جاۋىنگەر، Alem fighters سپورت كلۋبى جەلىسىنىڭ يەسى، «ارداق نازاروۆ» قورىنىڭ قۇرۋشىسى ارداق نازاروۆ، «Astana park» كينوتەاترىنىڭ نەگىزىن قالاۋشى ولجاس قۋاندىقوۆ، «Etky»كومپانياسىنىڭ يەسى جاندوس احمەتوۆ بار. ولار ءوز بيزنەسىن قالاي باستاعانى، قانداي قاتەلىكتەر جىبەرىلگەنى جانە ولاردى قالاي تۇزەتىلگەنى تۋرالى ايتتى.
«بيزنەستە تاباندىلىق، شىدامدىلىق قاجەت. ءاردايىم تاۋەكەل ەتىپ، كەز-كەلگەن كەدەرگىگە دايىن بولۋ كەرەك. قاتەلىكتەر مەن كەدەرگىلەردى سىناق رەتىندە قابىلداپ، شەگىنۋگە جول بەرمەۋ تىرىسقان ابزال. ويتكەنى، بارلىق سىناقتاردان ءوتىپ، تابىسقا جەتكەن سوڭ، ءسىز جەڭىستىڭ شىنايى ءدامىن سەزىنەسىز. مەن «جاس كاسىپكەر» سياقتى اۋقىمدى جوبانىڭ ءبىر بولىگى بولىپ تابىلعانىما وتە قۋانىشتىمىن. بۇل جوبا جاستاردىڭ تابىستى بولاشاعىنىڭ كەپىلى. «جاس كاسىپكەر« جوباسى كوپتەگەن بولاشاق كاسىپكەرلەر ءۇشىن تابىسقا جەتۋدىڭ باستاماسى بولادى دەپ سەنەمىن»، – دەدى ارداق نازاروۆ.
سپيكەرلەرگە سۇراقتار جولداعانداردىڭ دەنى كاسىپتى كاپيتالسىز قالاي باستاۋعا بولاتىنىن، قانداي سالادا كاسىپكەرلىكپەن اينالىسقاننىڭ دۇرىستىعىن جانە جاس بيزنەسمەندەرگە مەملەكەت قانداي قولداۋ كورسەتۋدە ەكەندىگىن سۇراپ، ناقتى جاۋاپتار الدى.
«ادىرنا»
ۇلتتىق پورتالى
