اقش پرەزيدەنتى دونالد ترامپتىڭ وتىنىشىنە قاراماستان، رەسەي ۋكراينامەن وتەتىن كەلىسسوزدەرگە پرەزيدەنت ۆلاديمير ءپۋتيننىڭ كومەكشىسى ۆلاديمير مەدينسكيدى قايتادان جىبەرەتىنىن مالىمدەدى. بۇل تۋرالى رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا 29 مامىر كۇنى «روسسيا 24» تەلەارناسىنىڭ ەفيرىندە ايتتى، دەپ حابارلايدى “ادىرنا”.
زاحاروۆانىڭ ايتۋىنشا، 2 ماۋسىمدا ستامبۋلدا ءوتۋى جوسپارلانعان ەكىنشى راۋند كەلىسسوزدەرگە رەسەي دەلەگاتسياسىنىڭ قۇرامى وزگەرىسسىز قالادى. ۆلاديمير مەدينسكي بۇعان دەيىن دە – 2022 جىلى جانە 2025 جىلدىڭ مامىر ايىندا وتكەن كەلىسسوزدەرگە رەسەيلىك دەلەگاتسيانى باستاپ بارعان ەدى. الايدا ونىڭ قاتىسۋى باتىس تاراپىنان، اسىرەسە اقش پەن كەيبىر ەۋروپالىق ەلدەردەن سىنعا ۇشىراعان.
اقش اكىمشىلىگى، اتاپ ايتقاندا پرەزيدەنت ترامپ پەن ونىڭ كومانداسى، مەدينسكيدىڭ كەلىسسوز پروتسەسىنەن شەتتەتىلگەنىن قالايدى. امەريكالىق شەنەۋنىكتەر، كيەۆ پەن ماسكەۋ اراسىنداعى ديالوگتى ۇيىمداستىرىپ وتىرعان تاراپتار، "قاتاڭ ۇستانىمدى ۇستاناتىن" تۇلعالاردىڭ كەلىسسوزدەرگە قاتىسۋىنا قارسى. ولار مەدينسكيدىڭ بۇرىنعى رەسەي مادەنيەت ءمينيسترى رەتىندەگى قىزمەتىن، سونداي-اق ۋكرايناعا قاتىستى باسقىنشىلىقتى اقتايتىن وقۋلىقتاردىڭ اۆتورى ەكەنىن العا تارتادى.
رەسەي مەن ۋكراينا وكىلدەرى اراسىنداعى الدىڭعى كەزدەسۋ 16 مامىر كۇنى ىسامبۇلدا وتكەن بولاتىن. بۇل سوڭعى ءۇش جىلدان استام ۋاقىتتاعى العاشقى تىكەلەي كەلىسسوزدەر بولدى. تاراپتار بەيبىتشىلىككە قاتىستى ناقتى كەلىسىمدەرگە كەلە المادى. The Economist مالىمەتىنە سايكەس، مەدينسكي كيەۆتەن دونەتسك، لۋگانسك، حەرسون جانە زاپوروجە وبلىستارىنىڭ جوعالۋىن مويىنداۋدى تالاپ ەتكەن. بۇل اۋماقتاردى رەسەي ارمياسى تولىق باسىپ الا الماي، تەك ءىشىنارا وككۋپاتسيالاپ وتىر. ەگەر ۋكراينا بۇل تالاپتان باس تارتسا، رەسەي سۋمى جانە حاركوۆ وبلىستارىنا شابۋىل جاساپ، «ماڭگىلىككە» سوعىساتىنىن ايتىپ قورقىتقان.
Bloomberg اگەنتتىگىنىڭ حابارلاۋىنشا، مەدينسكي حالىقارالىق قاۋىمداستىق قىرىم مەن رەسەيدىڭ «جاڭا وڭىرلەرى» دەپ اتالاتىن ايماقتاردى اننەكسيالاعانىن مويىنداۋى ءتيىس ەكەنىن ايتقان. باسقا شارتتار قاتارىندا ول ۋكراينانىڭ بەيتاراپ مارتەبەسىن جانە ونىڭ اۋماعىندا شەتەلدىك اسكەرلەردىڭ بولماۋىن اتادى.
رەسەي سىرتقى ىستەر ءمينيسترى سەرگەي لاۆروۆ كەلىسسوزدەردىڭ ەكىنشى كەزەڭىن 2 ماۋسىمدا ىستامبۇلدا وتكىزۋدى ۇسىندى. بۇعان جاۋاپ رەتىندە ۋكراين تاراپى رەسەيدىڭ بىتىمگە كەلۋ شارتتارىن الدىن الا جاريالاۋىن تالاپ ەتتى، الايدا كرەمل ناقتى ۇسىنىستار تەك دەلەگاتسيالار كەزدەسكەن كەزدە ايتىلاتىنىن جەتكىزدى. كيەۆ ءالى كۇنگە دەيىن كەلىسسوزدەرگە قاتىساتىنىن رەسمي تۇردە راستاعان جوق. وسى ارالىقتا اقش مەملەكەتتىك حاتشىسى ماركو رۋبيو لاۆروۆپەن كەلىسسوز جۇرگىزىپ، رەسەي تاراپىن ۋكراينامەن تىكەلەي ديالوگقا شاقىردى.
