اقش پەن يزرايل اۆياتسياسى يەمەننىڭ سولتۇستىگىندەگى بيلەۋشى «انسار اللا» (حۋسيتتەر) ءشيىت قوزعالىسىنىڭ سانا قالاسىنداعى اسكەري نىساندارىنا سوققى جاسادى، دەپ حابارلايدى "ادىرنا" ۇلتتىق پورتالى ريا نوۆوستي اگەنتتىگىنە سىلتەمە جاساپ.
جەرگىلىكتى بيلىك وكىلىنىڭ مالىمەتىنشە ەكى سوققى قوزعالىستىڭ زىمىران بريگادالارى شتابى ورنالاسقان اتتان تاۋىنا باعىتتالسا، تاعى ءبىر سوققى سانانىڭ شىعىس جاعىنان كورىنەتىن نۋكۋم تاۋىنداعى ەل-حافا اسكەري لاگەرىنە جاسالعان.
پەنتاگوننىڭ ورتالىق قولباسشىلىعى (CENTCOM) اۋە سوققىلارىنىڭ ماقساتى حۋسيتتەردىڭ زىمىران قويماسى مەن وپەراتسيالىق ورتالىعىن جويۋ بولعانىن حابارلادى.
CENTCOM مالىمدەمەسىندە وپەراتسيا حۋسيتتەردىڭ اقش اتك اسكەري جانە ساۋدا كەمەلەرىنە قىزىل تەڭىز، باب-ەل-ماندەب بۇعازى جانە ادەن شىعاناعىندا شابۋىل جاساۋ ارەكەتتەرىن السىرەتۋ ءۇشىن جۇزەگە اسىرىلعانى ايتىلعان. سونىمەن قاتار، قىزىل تەڭىز ۇستىندە حۋسيتتەردىڭ بىرنەشە ۇشقىشسىز ۇشاقتارى جويىلىپ، كەمەارالىق زىمىرانعا سوققى بەرىلدى.
بۇل سوققىلار حۋسيتتەردىڭ تەل-اۆيۆكە تۇنگى زىمىران شابۋىلىن جاساعانىن مويىنداعاننان كەيىن جاسالدى. شابۋىلدان 14 ادام جەڭىل جاراقات العان.
يزرايل مەن يەمەن اراسىنداعى سوققىلار ءيزرايلدىڭ گازا سەكتورىنداعى وپەراتسياسىن باستاعاننان كەيىن ۇدەي ءتۇستى. حۋسيتتەر حاماس توبىن قولدايتىنىن مالىمدەدى.
حۋسيتتەر بىرنەشە رەت اقش جانە ۇلىبريتانيامەن بايلانىسى بار كەمەلەرگە شابۋىل جاسادى دەپ ايىپتالدى. سوڭعى اپتالاردا ەكى امەريكاندىق ەسمينەتس شابۋىلعا ۇشىراعانى راستالدى.
