«قازاقمىس» كورپوراتسياسى شاحتەرلەردىڭ كۇش قۇرىلىمدارىنان قىسىم كورگەنى تۋرالى مالىمدەمەسىن جوققا شىعاردى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
«قازىرگى ۋاقىتتا «قازاقمىس» كورپوراتسياسىنىڭ كاسىپورىندارىندا جاعداي تۇراقتى. كەيبىر مالىمدەمەلەرگە قاراماستان، كومپانيانىڭ باسشىلىعى مەن قۇقىق قورعاۋ ورگاندارى تاراپىنان ەشقانداي قىسىم كورسەتىلمەدى. جەزقازعان مىس قورىتۋ زاۋىتى، جايسان، شاتىركۇل، ساياق كەن ورىندارى، سونداي-اق جىلاندى، جومارت، باتىس جانە شىعىس كەن ورىندارىنداعى بۇرعىلاۋ بريگادالارىنىڭ جۇمىسى قايتادان باستالدى»، - دەلىنگەن «قازاقمىس» كورپوراتسياسىنىڭ جۇما كۇنگى مالىمدەمەسىندە.
كورپوراتسيا جاعدايدى تەز ارادا شەشۋگە مۇددەلى ەكەنىن العا تارتادى.
«بۇعان دەيىن كورپوراتسيا 13-ءشى ايلىق جالاقىعا قوسىمشا 30% سىياقى تولەۋ جانە توقسان سايىنعى سىياقى شارتتارىن ورىنداعانىن راستادى. سونىمەن قاتار، 2025 جىلدىڭ 1 قاڭتارىنان باستاپ جالاقىنى 8,5%-عا يندەكساتسيالاۋ ۇسىنىسى كۇشىندە قالاتىنىن ايتتى. قىزمەتكەرلەردىڭ جالاقىسى نەگىزگى جانە سىياقى بولىكتەرىنەن تۇرادى. سىياقىلار وندىرىستىك جوسپاردىڭ ورىندالۋىنا قاراماستان تولەنەدى. وسىعان بايلانىستى قازىرگى تاڭدا ورتاشا جالاقى 730 431 تەڭگەنڭ قۇرايدى. بۇل قازاقستانداعى ورتاشا جالاقىدان ەكى ەسە جوعارى»، - دەپ مالىمدەدى كومپانيا.
«قازاقمىس» كورپوراتسياسى 40 مىڭعا جۋىق قىزمەتكەردىڭ ۇسىنىلعان شارتتاردى قولداعانىن، ال 65 شاحتا قىزمەتكەرلەرىنىڭ عانا قارسى ەكەنىن ايتتى.
«قول جەتكىزگەن ۋاعدالاستىقتارعا سايكەس، جۇمىس جالعاسىپ جاتقان نەمەسە قايتا باستالعان نىسانداردا 13-ءشى جالاقىعا ۇستەمەاقى تولىعىمەن تولەندى. سونداي-اق «قازاقمىس» كورپوراتسياسى كەنىشتەردەگى جۇمىسشىلاردى ىستىق تاماقپەن قامتاماسىز ەتۋدى جالعاستىرۋدا جانە جاعدايدى مۇمكىندىگىنشە تەزىرەك شەشۋ ءۇشىن سىندارلى ديالوگقا ۇمتىلاتىنىن راستايدى»، - دەلىنگەن حابارلامادا.
«قازاقمىس» كورپوراتسياسى ۇلىتاۋ وبلىسىنداعى ءبىر شاحتاعا پوليتسيا قىزمەتكەرلەرىنىڭ كەلگەنى تۋرالى تاراعان بەينەمازمۇندارعا تۇسىنىكتەمە بەرمەدى.
ەسكە سالساق، «قازاقمىس» كورپوراتسياسىنىڭ 200-گە جۋىق جۇمىسشىسى ساتپاەۆ قالاسىندا 17 جەلتوقساندا ەرەۋىل باستادى. 19 جەلتوقسان تۇنىندە «قازاقمىس» شاحتەرلاردىڭ جالاقىسىن 100%-عا كوتەرۋگە نيەتتى ەمەس ەكەنىن، ال ەرەۋىلشىلەر قىسىم كورسەتىلگەنىن مالىمدەدى. 20 جەلتوقسان تاڭەرتەڭ «قازاقمىس» جامبىل وبلىسىنداعى كەنىشپەن كەلىسىمگە كەلگەنىن حابارلاسا، كۇننىڭ ەكىنشى جارتىسىندا ۇلىتاۋ وبلىسىنداعى ءبىر شاحتاعا «قازاقمىس» كورپوراتسياسىنىڭ قارا كيىم كيگەن پوليتسيا قىزمەتكەرلەرى ەنگىزىلگەنى تۋرالى حابارلار تارادى. سوعان بايلانىستى شاحتەرلەر پرەزيدەنتكە ۇندەۋ جاساپ، قىسىم كورسەتىلگەنىن مالىمدەدى.
