سەناتتىڭ جالپى وتىرىسى قاراعاندىداعى كوستەنكو اتىنداعى شاحتادا قازا تاپقان كەنشىلەردى ءبىر مينۋت ۇنسىزدىكپەن ەسكە الۋدان باستالدى. بۇل تۋرادى سەناتتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
قاراعاندى وبلىسىنداعى شاحتادا ورىن العان قايعىلى جاعداي ءبارىمىزدىڭ قابىرعامىزدى قايىستىردى. وسى جاعدايعا بايلانىستى مەملەكەت باسشىسى قاسىم-جومارت توقاەۆتىڭ وكىمىمەن ەلىمىزدە جالپىۇلتتىق ازا تۇتۋ جاريالاندى. بۇدان بىلاي قايعىلى وقيعاعا سەبەپشى بولعان «ارسەلورميتتال تەمىرتاۋ» كومپانياسىمەن ەلىمىز ينۆەستيتسيالىق ىنتىماقتاستىقتى توقتاتادى. پرەزيدەنت تاپسىرماسىنا سايكەس، زارداپ شەككەن ازاماتتارعا جان-جاقتى قولداۋ جاسالادى. راسىمەن، وسىنداي قيىن ساتتە قوعام بولىپ جۇمىلۋدىڭ جانە ءوزارا دەمەۋ بولۋدىڭ ماڭىزى زور. سوندىقتان مەزگىلسىز قايتىس بولعانداردىڭ وتباسىلارىنا، تۋعان-تۋىستارىنا سەناتتىڭ اتىنان تاعى دا كوڭىل ايتىپ، قازا تاپقانداردى ءبىر مينۋت ۇنسىزدىكپەن ەسكە الايىق، - دەدى سەنات سپيكەرى ماۋلەن اشىمباەۆ.
ەسكە سالا كەتەيىك، قاراعاندى وبلىسىنداعى كوستەنكو شاحتاسىندا اپات بولىپ، 46 كەنشى قازا تاپقان بولاتىن.
