بىرىككەن ۇلتتار ۇيىمىنىڭ ادام قۇقىقتارى جونىندەگى كەڭەسى قازاقستانعا حالىقارالىق قىلمىستىق سوتتىڭ (حقس) ريم ستاتۋتىن راتيفيكاتسيالاۋدى ۇسىندى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
بۇل ۇسىنىس بۇۇ-نىڭ باس اسسامبلەياسىنا قازاقستان بويىنشا جۇمىس توبى دايىنداعان باياندامادا ايتىلعان.
ريم ستاتۋتى – حالىقارالىق قىلمىستىق سوتتىڭ ادامزاتقا قارسى قىلمىستار، اسكەري قىلمىستار، گەنوتسيد جانە اگرەسسيا سەكىلدى اۋىر قىلمىستار بويىنشا يۋريسديكتسياسىن رەتتەيتىن حالىقارالىق كەلىسىم. بۇل قۇجاتقا قول قويعان ەلدەر ونىڭ تالاپتارىن ورىنداۋعا جانە سوتپەن ىنتىماقتاستىق جاساۋعا مىندەتتەلەدى.
ەگەر قازاقستان ريم ستاتۋتىن راتيفيكاتسيالاسا، ونىڭ نورمالارىنا سايكەس، رەسەي پرەزيدەنتى ۆلاديمير پۋتين ەل اۋماعىنا كەلگەن جاعدايدا قاماۋعا الىنىپ، گااگاداعى سوتقا تاپسىرىلۋى ءتيىس. بۇل تالاپ حقس-تىڭ 2023 جىلدىڭ ناۋرىزىندا رەسەي باسشىسىنا شىعارعان تۇتقىنداۋ وردەرىنە نەگىزدەلگەن. حقس شەشىمدەرىنە مەملەكەت باسشىلارىنىڭ يممۋنيتەتى جۇرمەيدى. ال ستاتۋتتى بۇزۋ حالىقارالىق سانكتسيالارعا اكەلۋى مۇمكىن.
بۇۇ-نىڭ ادام قۇقىقتارى جونىندەگى كەڭەسى قازاقستاندا ادام قۇقىقتارىن بۇزعان كىنالىلەردىڭ جاۋاپسىز قالۋ ماسەلەسىن كوتەردى. دەگەنمەن، باياندامادا وڭ وزگەرىستەر دە اتاپ وتىلگەن. قازاقستان بيلىگى ۇسىنىستاردىڭ بىرقاتارىن ورىنداپ، ادام قۇقىقتارىن قورعاۋ سالاسىندا ىلگەرىلەۋ جاساعانى بەلگىلى بولدى.
