ىستانبۇلدا نوسەر جاڭبىر جاۋىپ، 1 ءجاسوسپىرىم قازا تاپتى. بۇل تۋرالى Haberler باسىلىمى جازدى، دەپ حابارلايدى «ادىرنا» ءتىلشىسى.
باق مالىمەتىنشە، بالات اۋدانىندا شالشىق سۋدى كەشىپ وتپەك بولعان 14 جاستاعى ءجاسوسپىرىمدى ەلەكتر توگى سوعىپ، ول كوز جۇمعان.
ىستانبۇل گۋبەرناتورىنىڭ باسقارماسى قالا اۋماعىندا 1 277 سۋ باسۋ وقيعاسى مەن 15 كوشكىن تىركەلگەنىن حابارلادى. سۋ باسۋ سالدارىنان 47 ادام شىعا الماي قالعان. سونىمەن قاتار 13 جاعدايدا اعاش قۇلاپ، ەكى رەت شاتىر ۇشقان.
توتەنشە جاعدايلار قىزمەتىنە 76 كولىككە، 808 تۇرعىن ۇيگە جانە 280 كاسىپورىنعا قاتىستى وقيعالار تۋرالى حابارلامالار تۇسكەن.
تۇركيانىڭ توتەنشە جاعدايلار جانە تابيعي اپاتتار باسقارماسى (AFAD) جانىنان داعدارىس شتابى قۇرىلعان. اپات سالدارىن جويۋ جۇمىستارىنا 8 مىڭ قىزمەتكەر مەن 2 مىڭ تەحنيكا جۇمىلدىرىلعان.
بيلىك وكىلدەرىنىڭ مالىمەتىنشە، جولدار اشىق، ال اۋەجايلاردا رەيستەردىڭ توقتاتىلۋى تىركەلمەگەن.
ال İz Gazete باسىلىمىنىڭ جازۋىنشا، ىستانبۇل بيلىگى 15 قازاندا قالاداعى بارلىق مەملەكەتتىك جانە جەكەمەنشىك مەكتەپتەردە ساباق توقتاتىلاتىنىن مالىمدەگەن. بۇدان بولەك، سارسەنبى كەشىنەن باستاپ قوسىمشا نۇسقاۋ بەرىلگەنگە دەيىن موتوتسيكلدەر مەن وزگە دە وسىعان ۇقساس ەكى دوڭگەلەكتى كولىك قۇرالدارىنىڭ قوزعالىسىنا تىيىم سالىنعان.
سونداي-اق مەملەكەتتىك مەكەمەلەردە جۇمىس ىستەيتىن مۇگەدەكتىگى بار قىزمەتكەرلەر، جۇكتى ايەلدەر، ارداگەرلەر جانە سەگىز جاسقا تولماعان بالالارى بار ايەل قىزمەتكەرلەر اكىمشىلىك تارتىپپەن جۇمىستان بوساتىلعان.
بۇقارالىق اقپارات قۇرالدارىنىڭ مالىمەتىنشە، سارسەنبى كۇنى ىستانبۇلدا ءبىر شارشى مەترگە شاققاندا 200 ميلليمەتردەن استام جاۋىن-شاشىن تۇسكەن. بيلىك بەيسەنبى كۇنى قالادا مەتەورولوگيالىق قاۋىپتىڭ سارى دەڭگەيىن جاريالاعان. تۇرعىندار مەن تۋريستەرگە اسا قاجەتتىلىك بولماسا، ۇيلەرىنەن شىقپاۋعا كەڭەس بەرىلگەن.
