اۋعانستاننان كەلگەن 23 جاستاعى سودابا اتتار ءوزىنىڭ تۋعان ەلىنە ورالۋعا ءماجبۇر بولۋدان قاۋىپتەنىپ، قازاقستاننان بوسقىن مارتەبەسىن سۇراعانىمەن، ءوتىنىشى قاناعاتتاندىرىلمادى، دەپ حابارلايدى "ادىرنا" ۇلتتىق پورتالى Stan.kz-كە سىلتەپ.
قازاقستان سوتى ونىڭ ءوتىنىشىن قابىلداماۋ تۋرالى شەشىم شىعاردى.
سودابا اتتار اۋعانستاندا تاليبان بيلىككە كەلمەي تۇرىپ، قىزدارعا ءبىلىم بەرۋ جانە حالىقارالىق ۇيىمدارمەن جۇمىس ىستەۋ سالاسىندا قىزمەت اتقارعان. 2023 جىلدىڭ شىلدەسىندە ونىڭ اكەسىنە تالىپتەردەن حات كەلگەن، وندا قىزعا ء"ولىم نەمەسە ءماجبۇرلى نەكە" كۇتىپ تۇرعانى حابارلانعان. بۇل سودابانى ەلىنەن قاشۋعا ءماجبۇر ەتتى.
2022 جىلى يران ارقىلى قازاقستانعا كەلىپ، ءبىلىم الۋ ۆيزاسىمەن الماتىداعى ۋنيۆەرسيتەتكە گرانتقا تۇسكەن. الايدا وقۋىن جالعاستىرا الماۋى سەبەبىنەن ۆيزاسىنىڭ كۇشى جويىلىپ، ول زاڭدى مارتەبەسىنەن ايىرىلدى. قازاقستان بيلىگىنە بوسقىن مارتەبەسىن سۇراپ جۇگىنگەنىمەن، ونىڭ ءوتىنىشى دالەلدەردىڭ تۇپنۇسقاسىن ۇسىنباعاندىقتان قابىلدانبادى.
سوت سودابا اتتاردىڭ ۇسىنىلعان قۇجاتتارىنىڭ تۇپنۇسقالىعىن تەكسەرۋ مۇمكىن ەمەستىگىن العا تارتتى. سۋديا الميرا راحىمجانوۆا سودابانىڭ تالاپتارىن قاناعاتتاندىرۋدان باس تارتتى. سونىمەن قاتار، اۋعان بيلىگىنىڭ وعان شەتەلگە شىعۋعا مۇمكىندىك بەرگەنىن ەسكەرە وتىرىپ، وتانىنا ورالۋعا نەگىزسىز قورقىنىش بار دەپ ەسەپتەدى.
سودابا اتتار سوت شەشىمىنە شاعىم ءتۇسىرۋدى جوسپارلاپ وتىر. ونىڭ ايتۋىنشا، قۇجاتتاردى تالىپتەردىڭ قولىنا ءتۇسىرۋ قاۋپى ونى تۇپنۇسقالاردى ۇسىنۋدان باس تارتۋعا ماجبۇرلەگەن.
سودابا اتتاردىڭ تاعدىرىنا قاتىستى سوڭعى شەشىم ءالى بەلگىسىز. ول ءوزىنىڭ قاۋىپسىزدىگى ءۇشىن كۇرەسىن جالعاستىرۋدا.
