اۋعانستانعا بارعان قازاقستان توتەنشە جاعدايلار مينيسترلىگىنىڭ كۇشتەرى مەن قۇرالدارى ەلگە ورالدى. بۇل تۋرالى توتەنشە جاعدايلار مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
گۋمانيتارلىق ميسسيانى ورىنداۋ ءۇشىن جالپى 45 ادام، ونىڭ ىشىندە تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى، كينولوگيالىق ەسەپتوپتارى، اپاتتار مەديتسيناسى ورتالىعىنىڭ دارىگەرلەرى مەن فەلدشەرلەرى جىبەرىلگەن بولاتىن.
تجم ازاماتتىق قورعانىس جانە اسكەري بولىمدەرى كوميتەتى توراعاسىنىڭ مىندەتىن اتقارۋشى گەنەرال-مايور ۇلاربەك ابىكەەۆتىڭ باسشىلىعىمەن قازاقستاندىق قۇتقارۋشىلار جاساعى قويىلعان مىندەتتەردى ابىرويمەن ورىندادى، - دەپ اتاپ ءوتتى ۆەدومستۆودا.
قۇتقارۋشىلاردى اۋەجايدا ارىپتەستەرى، تۋىستارى مەن جاقىندارى قارسى الدى. سونداي-اق "Lider.kz" قوزعالىسىنىڭ ۆولونتەرلەرى دە بولدى. ولار چارلي، دجەيكوب پەن ەۆرو اتتى قۇتقارۋشى يتتەرگە مەدال دايىندادى.
