پرەزيدەنت سادىر جاپاروۆتىڭ جارلىعىمەن قىرعىزستان ۇكىمەتىنىڭ توراعاسى قىزمەتىنە ادىلبەك قاسىماليەۆ تاعايىندالدى، دەپ حابارلايدى "ادىرنا" ۇلتتىق پورتالى 24.kg اقپارات اگەنتتىگىنە سىلتەمە جاساپ.
ادىلبەك قاسىماليەۆ 1960 جىلى 1 جەلتوقساندا ىستىقكول وبلىسىنىڭ ءتۇپ اۋدانىندا دۇنيەگە كەلگەن. ول لەنينگراد قارجى-ەكونوميكالىق ينستيتۋتىن "ەكونوميست" ماماندىعى بويىنشا تامامداعان. 2015-2018 جىلدارى قىرعىزستاننىڭ قارجى ءمينيسترى قىزمەتىن اتقارعان. 2021-2022 جىلدارى پرەزيدەنت اكىمشىلىگى باسشىسىنىڭ ورىنباسارى بولدى. 2022 جىلى ۇكىمەت باسشىسىنىڭ ءبىرىنشى ورىنباسارى مىندەتىن اتقارۋشى بولىپ تاعايىندالدى.
18 جەلتوقساندا جوگوركۋ كەڭەش وتىرىسىندا پرەزيدەنت سادىر جاپاروۆ بۇرىنعى پرەمەر-ءمينيستردىڭ وتستاۆكاسىنا قاتىستى تۇسىنىكتەمە بەردى. ول مۇنى سالىق قىزمەتىنىڭ باسشىلىعى مەن قىزمەتكەرلەرىنە قاتىستى تەرگەۋ ىسىمەن بايلانىستىردى.
«ءبىزدى سالىق جۇيەسىندەگى جاعىمسىز قۇبىلىستار قاتتى الاڭداتتى. اكتسيزدىك ماركالارعا قاتىستى الاياقتىق ارەكەتتەر بەلگىلى بولدى. بۇل سالانى اقىلبەك جاپاروۆ باسقارىپ كەلگەن، جانە ول زاڭسىز ارەكەتتەردى توقتاتا الار ەدى. مەن ونى تەرگەۋ اياسىندا مۇددەلەر قاقتىعىسىن بولدىرماۋ ءۇشىن قىزمەتىنەن بوساتۋعا ءماجبۇر بولدىم»، – دەدى پرەزيدەنت.
ەسكە سالا كەتەيىك، 16 جەلتوقسان كۇنى قىرعىزستان مينيسترلەر كابينەتىنىڭ توراعاسى اقىلبەك جاپاروۆ قىزمەتىنەن كەتكەنىن جازعان ەدىك.
