15 جەلتوقسان كۇنى الماتىدا قازاقستاننىڭ تاۋەلسىزدىگىن جاريالاعان جوعارعى كەڭەستىڭ توراعاسى، كورنەكتى مەملەكەت قايراتكەرى، ەكونوميست عالىم سەرىكبولسىن ءابدىلدين تۋرالى دەرەكتى ءفيلمنىڭ تۇساۋكەسەرى ءوتتى، دەپ حابارلايدى «ادىرنا» ءتىلشىسى.
«توراعا ءابدىلدين» اتتى تۋىندىنىڭ رەجيسسەرى — قانات تىلەۋحان. فيلمدە تاۋەلسىزدىكتەن بەرگى وقيعالار قامتىلعان. ءار جىلدارى بەرگەن سۇحباتتارىنان، ءتۇرلى جينالىس-كەزدەسۋلەردە ايتقارىنان ۇزىندىلەر كەلتىرىلىپ، سول كەزەڭنىڭ وقيعالارى بايان ەتىلەدى.
«Cوناۋ توقسانشى جىلداردىڭ باسىندا سەرىكبولسىن ءابدىلدين وبلىس اكىمدەرىنە دەيىن سايلايمىز دەپ پارلامەنت مىنبەرىنەن سويلەپ ەدى. پرەزيدەنتتىڭ قولىنا بارلىق قۇزىردى بەرمەيتىن كونستيتۋتسيا قابىلدادى. ارينە، ارىپتەستەرىمەن. ءبىر عانا مىسال، پارلامەنت كونستيتۋتسيالىق سوتتى، جوعارعى سوت توراعاسىن سايلايتىن. باس پروكۋرور مەن ۇلتتىق بانك توراعاسىن تاعايىندايتىن. وكىنىشكە قاراي، قازاقستان ءابدىلديننىڭ كونستيتۋتسياسىمەن ەكى-اق جىل ءومىر ءسۇردى. ءبىز تۇسىرگەن فيلمدە كەيىپكەرىمىزدىڭ مەملەكەتتىك تىلگە كونستيتۋتسيادان قالاي مارتەبە الىپ بەرگەنى جايلى دا ايتىلادى»،—دەيدى رەجيسسەر.
قانات تىلەۋحان الداعى ۋاقىتتا تۋىندىنىڭ YouTube-كە جۇكتەلىپ، كوپشىلىككە ۇسىنىلاتىن اتاپ ءوتتى.
سەرىكبولسىن ءابدىلدين 1967 جىلدان باستاپ قازاق سسر جوسپارلاۋ كوميتەتىندە ءبىراز ۋاقىت بويى جۇمىس ىستەدى. كەيىننەن اۋىل شارۋاشىلىعى مينيسترلىگىندە باسشىلىق قىزمەتىن اتقارسا، كەيىننەن قازاق سسر مينيسترلەر كەڭەسىنىڭ ماسكەۋدەگى وكىلى بولدى. ال 1990 جىلى ءحىى شاقىرىلىمداعى قازاق سسر جوعارعى كەڭەسىنىڭ دەپۋتاتى، كەيىن جوعارعى كەڭەس توراعاسىنىڭ ورىنباسارى، 1991 جىلدىڭ قازانىنان 1993 جىلى 13 جەلتوقساندا جوعارعى كەڭەس تاراتىلعانعا دەيىن ونىڭ توراعاسى بولعان.
سەرىكبولسىن ءابدىلدين باسشىلىق ەتكەن ۋاقىتتا جوعارعى كەڭەس 1991 جىلى 16 جەلتوقساندا "قازاقستاننىڭ مەملەكەتتىك تاۋەلسىزدىگى تۋرالى" دەكلاراتسيانى قابىلداعان. كەيىن نازارباەۆ ساياساتىنا قارسى بولىپ، وپپوزيتسياعا كەتتى. نازارباەۆتى ءجيى سىنايتىن. ونىڭ ايتقاندارىن نازارباەۆ جوققا دا شىعارمادى، راستامادى دا.
قازاقستان كوممۋنيستىك پارتياسى توراعاسى بولعان ءابدىلدين قازاقستاننىڭ ءبىرىنشى پرەزيدەنتى نۇرسۇلتان نازارباەۆ ورناتقان اۆتوريتارلى بيلىك جۇيەسىن اشىق تا قاتاڭ سىنادى. ول 1999 جىلى 10 قاڭتاردا كەزەكتەن تىس وتكەن پرەزيدەنت سايلاۋىنا نازارباەۆپەن باسەكەلەس كانديدات رەتىندە قاتىستى. سايلاۋدىڭ رەسمي قورىتىندىسى بويىنشا، ساياساتكەر از داۋىس جيناعان. بىراق ءابدىلدين "سايلاۋ ناتيجەسى بۇرمالاندى" دەپ مالىمدەدى.
ساياساتكەر 2019 جىلى 31 جەلتوقساندا 83 جاسقا قاراعان شاعىندا قايتىس بولدى.
