15 jeltoqsan künı Almatyda Qazaqstannyŋ täuelsızdıgın jariialaǧan Joǧarǧy keŋestıŋ töraǧasy, körnektı memleket qairatkerı, ekonomist ǧalym Serıkbolsyn Äbdıldin turaly derektı filmnıŋ tūsaukeserı öttı, dep habarlaidy «Adyrna» tılşısı.
«Töraǧa Äbdıldin» atty tuyndynyŋ rejisserı — Qanat Tıleuhan. Filmde täuelsızdıkten bergı oqiǧalar qamtylǧan. Är jyldary bergen sūhbattarynan, türlı jinalys-kezdesulerde aitqarynan üzındıler keltırılıp, sol kezeŋnıŋ oqiǧalary baian etıledı.
«Conau toqsanşy jyldardyŋ basynda Serıkbolsyn Äbdıldin oblys äkımderıne deiın sailaimyz dep parlament mınberınen söilep edı. Prezidenttıŋ qolyna barlyq qūzyrdy bermeitın Konstitusiia qabyldady. Ärine, ärıptesterımen. Bır ǧana mysal, parlament konstitusiialyq sotty, joǧarǧy sot töraǧasyn sailaityn. Bas prokuror men Ūlttyq bank töraǧasyn taǧaiyndaityn. Ökınışke qarai, Qazaqstan Äbdıldinnıŋ konstitusiiasymen ekı-aq jyl ömır sürdı. Bız tüsırgen filmde keiıpkerımızdıŋ memlekettık tılge konstitusiiadan qalai märtebe alyp bergenı jaily da aitylady»,—deidı rejisser.
Qanat Tıleuhan aldaǧy uaqytta tuyndynyŋ YouTube-ke jüktelıp, köpşılıkke ūsynylatyn atap öttı.
Serıkbolsyn Äbdıldin 1967 jyldan bastap Qazaq SSR josparlau komitetınde bıraz uaqyt boiy jūmys ıstedı. Keiınnen auyl şaruaşylyǧy ministrlıgınde basşylyq qyzmetın atqarsa, keiınnen Qazaq SSR ministrler keŋesınıŋ Mäskeudegı ökılı boldy. Al 1990 jyly HII şaqyrylymdaǧy Qazaq SSR Joǧarǧy Keŋesınıŋ deputaty, keiın Joǧarǧy Keŋes töraǧasynyŋ orynbasary, 1991 jyldyŋ qazanynan 1993 jyly 13 jeltoqsanda Joǧarǧy Keŋes taratylǧanǧa deiın onyŋ töraǧasy bolǧan.
Serıkbolsyn Äbdıldin basşylyq etken uaqytta Joǧarǧy Keŋes 1991 jyly 16 jeltoqsanda "Qazaqstannyŋ memlekettık täuelsızdıgı turaly" deklarasiiany qabyldaǧan. Keiın Nazarbaev saiasatyna qarsy bolyp, oppozisiiaǧa kettı. Nazarbaevty jiı synaityn. Onyŋ aitqandaryn Nazarbaev joqqa da şyǧarmady, rastamady da.
Qazaqstan kommunistık partiiasy töraǧasy bolǧan Äbdıldin Qazaqstannyŋ bırınşı prezidentı Nūrsūltan Nazarbaev ornatqan avtoritarly bilık jüiesın aşyq ta qataŋ synady. Ol 1999 jyly 10 qaŋtarda kezekten tys ötken prezident sailauyna Nazarbaevpen bäsekeles kandidat retınde qatysty. Sailaudyŋ resmi qorytyndysy boiynşa, saiasatker az dauys jinaǧan. Bıraq Äbdıldin "sailau nätijesı būrmalandy" dep mälımdedı.
Saiasatker 2019 jyly 31 jeltoqsanda 83 jasqa qaraǧan şaǧynda qaitys boldy.
