شىعىس قازاقستان وبلىسىنداعى تاۋ-شاڭعى كۋرورتىندا جاتتىعۋ كەزىندە اسپالى جولدىڭ تروسى ءۇزىلىپ، 2013 جىلى تۋعان سپورتشى يىعىنان جاراقات الدى، دەپ حابارلايدى “ادىرنا” ۇلتتىق پورتالى.
بۇل تۋرالى وبلىس اكىمدىگى مالىمدەدى.
وقيعا 14 جەلتوقسان كۇنى گلۋبوكوە اۋدانىنداعى دەمالىس بازاسىندا بولعان. تروس ءۇزىلىسى سالدارىنان سپورتشىلاردىڭ ءبىرى جاراقات العان سوڭ، وقيعا ورنىنا جەدەل جاردەم شاقىرىلدى.
“اۋىر جاراقات انىقتالماعانىمەن، سپورتشى تولىق مەديتسينالىق تەكسەرۋدەن ءوتۋ ءۇشىن وسكەمەن قالاسىنداعى انا مەن بالا ورتالىعىنا جەتكىزىلدى”، – دەلىنگەن حابارلامادا.
وقيعا ورنىنا قۇقىق قورعاۋ ورگاندارى، دەنە شىنىقتىرۋ جانە سپورت باسقارماسىنىڭ قىزمەتكەرلەرى، سونداي-اق گلۋبوكوە اۋدانىنىڭ اكىمى ەلدار تۇماشينوۆ كەلگەن.
تروس ءۇزىلۋىنىڭ سەبەبىن انىقتاۋ ءۇشىن ارنايى كوميسسيا قۇرىلىپ، ماسەلە وبلىس اكىمىنىڭ جەكە باقىلاۋىنا الىندى.
