الماتى حالىقارالىق اۋەجايى 2024 جىلدىڭ 1 قاڭتارىنان باستاپ جولاۋشىلار تەرمينالدارى جانىنداعى تۇراققا جاڭا تاريف ەنگىزەتىنىن مالىمدەدى، دەپ حابارلايدى “ادىرنا” ۇلتتىق پورتالى.
اۋەجاي باسشىلىعى بۇل قادامدى پاندۋس قۇرىلىسىنا جۇمسالعان شىعىنداردى وتەۋ جانە تۇراق ينفراقۇرىلىمىن ودان ءارى جاقسارتۋ قاجەتتىلىگىمەن تۇسىندىرەدى.
اۋەجاي اكىمشىلىگىنىڭ مالىمەتىنشە، تۇراق ساپاسىن ارتتىرۋ ماقساتىندا بىرنەشە جاڭعىرتۋ جۇمىستارى جۇرگىزىلگەن. وعان ەكىنشى قاباتقا جاڭا پاندۋس سالۋ، تۇراق ورىندارىنىڭ سانىن كوبەيتۋ جانە ءنومىردى اۆتوماتتى تۇردە تانۋ جۇيەسىن ەنگىزۋ سياقتى زاماناۋي تەحنولوگيالار كىرەدى.
«ءبىز تۇراقتى بارىنشا ىڭعايلى ەتۋگە تىرىسامىز. ونىڭ قاۋىپسىزدىگى مەن تيىمدىلىگىن ارتتىرۋ ءۇشىن جۇيەلى تۇردە جاڭارتىپ، جاقسارتىپ وتىرامىز. بۇل كليەنتتەرىمىزدىڭ جايلىلىعى مەن قاۋىپسىزدىگىن قامتاماسىز ەتۋگە باعىتتالعان ماڭىزدى قادامدار»، – دەپ اتاپ ءوتتى الماتى اۋەجايىنىڭ وكىلدەرى.
جاڭا تاريفتەردىڭ ناقتى مولشەرى تۋرالى اقپارات جاقىن كۇندەرى جاريالانۋى مۇمكىن. تۇراق باعاسىنىڭ كوتەرىلۋى جولاۋشىلارعا ىڭعايلى ءارى زاماناۋي قىزمەت كورسەتۋ ءۇشىن جاسالىپ وتىرعانى ايتىلدى.
ەسكە سالايىق، الماتى حالىقارالىق اۋەجايى – قازاقستاننىڭ ەڭ ءىرى اۋە قاقپاسى.
