«شاحريستان» ورتالىعى اۋليەاتانىڭ اتىن اسپانداتادى

2043

ەكى مىڭ جىلدىق تاراز شاھارى تۋرزيم دامىتۋدا تاپتىرماس مۇمكىندىك. سوندىقتان دا جامبىل وبلىسى اكىمى اسقار مىرزاحمەتوۆ تاراز قالاسى شەبەرلەر ورتالىعىنا اينالۋى كەرەك دەپ وتىر.

وبلىس اكىمدىگىندە وتكەن «شاحريستان» ەتنو-مادەني ورتالىعىنىڭ قۇرىلىسىنىڭ بارىسى قارالعان جيىندا ايتىلدى. بۇل ەتنو-مادەني ورتالىقتا ورىن الاتىن بىرنەشە نىساندار باسقارمالار مەن قالا اكىمدىگىنە ءبولىنىپ بەرىلگەن. قازىرگى تاڭدا قۇرىلىس جۇمىستارى قارقىندى ءجۇرىپ، قۇرىلىسشىلار ەكى اۋىسىمدا ەڭبەك ەتىپ جاتىر.

وبلىس اكىمىنىڭ ورىنباسارى ەركەبۇلان داۋىلباەۆتىڭ ايتۋىنشا، ورتالىقتىڭ نىساندارىن وزدەرىنىڭ قولدانىسىنا قاراي بەزەندىرۋ كەرەك. ءوز كەزەگىندە وبلىس اكىمى اسقار مىرزاحمەتوۆ بەزەندىرۋ شارالارى بويىنشا ءوز ويىن ورتاعا سالدى.

«جالپى، بۇل جۇمىستار رۋحاني جاڭىرۋ قۇندىلىقتارىن ەسكەرۋدى كەرەك ەتەدى. بوي كوتەرگەن عيماراتتىڭ ءوزى، ءار قاباتتا ورىن الاتىن تاقىرىپتىق بولمەلەر بەزەندىرىلۋىمەن ۇندەسۋى دە قاجەت. سونداي-اق، وسى ديزاينەرلىك بەلسەندىلىكتە جاڭا تەحنولوگيالاردى يگەرگەن كومپانيالارمەن بىرلەسە جۇمىس جاساۋ شارت. ارينە، ءبىر عانا تارازدا ونداي الەۋەتى جوعارى كومپانيالار جوق بولسا، وزگە قالالاردان دا شاقىرۋ كەرەك. ورتالىقتا ورىن الاتىن ءار تاقىرىپتىق نىسانداردا مىسالى، شەرحان مۇرتازا ورتالىعىندا ول كىسىنىڭ سوزدەرى جازىلىپ، تاربيەلىك، ونەگەلىك وي تولعامدارى دا ورىن الۋى كەرەك. سونىمەن قاتار، كەشەگى كۇلتەگىن، بالاساعۇن، قاعانداردىڭ ونەگەلى سوزدەرى دە ايشىقتالاتىن بولادى. ءبىز وسى ورتالىق ارقىلى تارازدىڭ الەۋەتىن الەمگە تانىتۋدى ماقسات ەتۋىمىز كەرەك. سوندىقتان، بەزەندىرۋ جۇمىستارىنىڭ جان-جاقتىلىعى، ۇندەستىگى، زاماناۋيلىعى قاتاڭ ەسكەرىلەتىن بولادى»، – دەدى وبلىس اكىمى.

تۋريزم باسقارماسىنىڭ باسشىسى قارلىعاش ارالبەكوۆانىڭ ايتۋىنشا كەلەشەكتە مۇندا تۋريزم نىساندارىنىڭ ونلاين كارتاسى ىسكە قوسىلماق. سونداي-اق، ول كورمەگە بۇگىنگى كۇننىڭ وزىندە تارازدىق 23 شەبەردىڭ 1118 بۇيىمى قويىلاتىنىن ەسكەرتتى. ولار ساتىلىمعا دا شىعادى. ول ءۇشىن جەرگىلىكتى كاسىپكەرلەر ءۇش ازاماتتى تۇراقتى جۇمىسپەن قامتۋدى دا كوزدەپ وتىر.

«ءبىز تارازعا وزگە دە قالالاردىڭ ۇستا، شەبەرلەرىن شاقىرىپ، ولاردىڭ بۇيىمدارىن كورمەگە قويۋىمىز كەرەك. كورشى جاتقان وبلىس ورتالىقتارىندا مۇنداي ورتالىق ازىرگە جوق. سوندىقتان، ولاردىڭ ياعني ۇستا-شەبەرلەردىڭ الەۋەتىن پايدالانا وتىرىپ، ءتۋريزمنىڭ ءبىر تەتىگىن دامىتۋعا ىقپال ەتۋىمىز كەرەك. جالپى، ەتنو-مادەني ورتالىقتىڭ جۇمىسىن جۇيەلى جۇرگىزۋ ءۇشىن بىرىڭعاي جۇيەنى ەنگىزۋ كەرەك. پاريج – ءسان ورتالىعىنا اينالعان قالا دەسەك، ءبىز تارازدى – ۇستا-شەبەرلەردىڭ شەبەرحاناسىنا، ورتالىعىنا اينالدىرۋىمىزعا مول مۇمكىندىگىمىز بار. سول ورايدا جۇمىس جۇرگىزۋىمىز قاجەت. الداعى ۋاقىتتا «كورمە» زالىندا جامبىل وبلىسىنىڭ 80 جىلدىعىن اتاپ وتەتىن بولامىز» – دەدى وبلىس اكىمى.

«ادىرنا»

ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket