Eki myń jyldyq Taraz shahary týrzım damytýda taptyrmas múmkindik. Sondyqtan da Jambyl oblysy ákimi Asqar Myrzahmetov Taraz qalasy sheberler ortalyǵyna aınalýy kerek dep otyr.
Oblys ákimdiginde ótken «Shahrıstan» etno-mádenı ortalyǵynyń qurylysynyń barysy qaralǵan jıynda aıtyldy. Bul etno-mádenı ortalyqta oryn alatyn birneshe nysandar basqarmalar men qala ákimdigine bólinip berilgen. Qazirgi tańda qurylys jumystary qarqyndy júrip, qurylysshylar eki aýysymda eńbek etip jatyr.
Oblys ákiminiń orynbasary Erkebulan Daýylbaevtyń aıtýynsha, ortalyqtyń nysandaryn ózderiniń qoldanysyna qaraı bezendirý kerek. Óz kezeginde oblys ákimi Asqar Myrzahmetov bezendirý sharalary boıynsha óz oıyn ortaǵa saldy.
«Jalpy, bul jumystar rýhanı jańyrý qundylyqtaryn eskerýdi kerek etedi. Boı kótergen ǵımarattyń ózi, ár qabatta oryn alatyn taqyryptyq bólmeler bezendirilýimen úndesýi de qajet. Sondaı-aq, osy dızaınerlik belsendilikte jańa tehnologııalardy ıgergen kompanııalarmen birlese jumys jasaý shart. Árıne, bir ǵana Tarazda ondaı áleýeti joǵary kompanııalar joq bolsa, ózge qalalardan da shaqyrý kerek. Ortalyqta oryn alatyn ár taqyryptyq nysandarda mysaly, Sherhan Murtaza ortalyǵynda ol kisiniń sózderi jazylyp, tárbıelik, ónegelik oı tolǵamdary da oryn alýy kerek. Sonymen qatar, keshegi Kúltegin, Balasaǵun, Qaǵandardyń ónegeli sózderi de aıshyqtalatyn bolady. Biz osy ortalyq arqyly Tarazdyń áleýetin álemge tanytýdy maqsat etýimiz kerek. Sondyqtan, bezendirý jumystarynyń jan-jaqtylyǵy, úndestigi, zamanaýılyǵy qatań eskeriletin bolady», – dedi oblys ákimi.
Týrızm basqarmasynyń basshysy Qarlyǵash Aralbekovanyń aıtýynsha keleshekte munda týrızm nysandarynyń onlaın kartasy iske qosylmaq. Sondaı-aq, ol kórmege búgingi kúnniń ózinde tarazdyq 23 sheberdiń 1118 buıymy qoıylatynyn eskertti. Olar satylymǵa da shyǵady. Ol úshin jergilikti kásipkerler úsh azamatty turaqty jumyspen qamtýdy da kózdep otyr.
«Biz Tarazǵa ózge de qalalardyń usta, sheberlerin shaqyryp, olardyń buıymdaryn kórmege qoıýymyz kerek. Kórshi jatqan oblys ortalyqtarynda mundaı ortalyq ázirge joq. Sondyqtan, olardyń ıaǵnı usta-sheberlerdiń áleýetin paıdalana otyryp, týrızmniń bir tetigin damytýǵa yqpal etýimiz kerek. Jalpy, etno-mádenı ortalyqtyń jumysyn júıeli júrgizý úshin biryńǵaı júıeni engizý kerek. Parıj – sán ortalyǵyna aınalǵan qala desek, biz Tarazdy – usta-sheberlerdiń sheberhanasyna, ortalyǵyna aınaldyrýymyzǵa mol múmkindigimiz bar. Sol oraıda jumys júrgizýimiz qajet. Aldaǵy ýaqytta «Kórme» zalynda Jambyl oblysynyń 80 jyldyǵyn atap ótetin bolamyz» – dedi oblys ákimi.
«ADYRNA»
ulttyq portaly
