تاليباندار ۇكىمەتىنىڭ بوسقىندار جانە رەپاترياتسيا ىستەرى بويىنشا ءمينيسترىنىڭ مىندەتىن اتقارۋشى حاليل راحمان حاككاني كابۋلدا جارىلىس سالدارىنان قازا تاپتى، دەپ حابارلايدى "ادىرنا" ۇلتتىق پورتالى.
بۇل اقپاراتتى «تاليبان» قوزعالىسىنىڭ رەسمي وكىلى زابيحۋللا مۋجاحيد راستادى.
ءبىر دەرەكتەر بويىنشا جارىلىس بوسقىندار ىستەرى مينيسترلىگىنىڭ اۋماعىندا بولعان، ال باسقا مالىمەتتەرگە سايكەس، مەشىتتە بولعان. حاككانيمەن بىرگە تاعى ءۇش ادام قايتىس بولدى.
باق مالىمەتتەرىندە قازا تاپقاندار ونىڭ وققاعارلارى دەپ كورسەتىلگەن.
ايتا كەتەيىك، 58 جاستاعى حاليل راحمان حاككاني 2021 جىلعى 7 قىركۇيەكتەن باستاپ بوسقىندار ىستەرى ءمينيسترىنىڭ مىندەتىن اتقارۋشى بولىپ كەلگەن. ول «حاككاني جەلىسىنىڭ» نەگىزىن قالاۋشى دجالالۋددين حاككانيدىڭ باۋىرى جانە قازىرگى جەلىنىڭ باسشىسى ءارى «تاليباننىڭ» ىشكى ىستەر ءمينيسترى سيرادجۋددين حاككانيدىڭ اعاسى ەدى. ونىڭ وتباسى ۇزاق ۋاقىت بويى «تاليباننىڭ» وپەراتسيالارى مەن ستراتەگياسىندا ورتالىق ءرول اتقارىپ كەلگەن.
2011 جىلى اقش قارجى مينيسترلىگى حاليل حاككانيدى جاھاندىق قاۋىپتى تەرروريستەردىڭ (SDGT) تىزىمىنە قوسقان. وعان اۋعانستان مەن پاكىستانداعى «ال-كايدا» اتىنان ارەكەت جاساعانى ءۇشىن ايىپ تاعىلعان. اقش ۇكىمەتى حاككانيدى تۇتقىنداۋعا اكەلەتىن اقپارات ءۇشىن 5 ميلليون دوللار سىياقى جاريالاعان.
