2024 جىلدىڭ 10 جەلتوقسانىندا استانادا زەردەلى مەكتەپتەرى مەن ورتالىقتارىنىڭ «10 جىلدا جارىق كورگەن 100 كىتاپ» اتتى تۇساۋكەسەر شاراسى ءوتتى. بۇل ماڭىزدى جوبا ءبىلىم بەرۋ سالاسىنداعى جاڭاشىلدىق پەن ەل بولاشاعىنا قوسقان ۇلەستىڭ جارقىن كورىنىسى.
تۇساۋكەسەرگە قر پارلامەنتى سەناتىنىڭ دەپۋتاتى ورىنباەۆ بەكبول تىلەۋمۇراتۇلى، تولاميسوۆ امانگەلدى عابدىلكارىمۇلى، ءماجىلىس دەپۋتاتتارى نۇرگۇل تاۋ، قۇسپەكوۆ ولجاس، قر وقۋ-اعارتۋ مينيسترليگى ورتا ءبىلىم بەرۋ كوميتەتىنىڭ توراعاسى جۇماشەۆ بەكبولات قانىبەكۇلى جانە ءبىلىم سالاسىنىڭ زيالى قاۋىم وكىلدەرى قاتىستى.
شارانىڭ اشىلۋىندا قر پارلامەنتى سەناتىنىڭ دەپۋتاتى بەكبول تىلەۋمۇراتۇلى: «ەلدىڭ دامۋى ءۇشىن ءاربىر ادامنىڭ تەرەڭ ءبىلىمدى نەمەسە ەڭبەكقور بولۋى ماڭىزدى. پرەزيدەنتىمىز قاسىم-جومارت توقاەۆ اتاپ وتكەندەي، بىزگە «تەحنوكراتيالىق ەل» بولۋ ءۇشىن ماتەماتيكا مەن جاراتىلىستانۋ پاندەرىنىڭ ساپاسىن ارتتىرۋ قاجەت. زەردەلى مەكتەپتەرى وسى ماقساتقا ادال قىزمەت ەتىپ كەلەدى. 10 جىل ىشىندە 100 وقۋلىق جازۋ – ەل دامۋىنا قوسقان زور ۇلەس»، – دەپ اتاپ ءوتتى.
كىتاپتار مازمۇنى بويىنشا ماتەماتيكا، جاراتىلىستانۋ، گۋمانيتارلىق جانە اعىلشىن ءتىلى پاندەرىنە ارنالعان ەڭبەكتەرگە توپتاستىرىلدى. ءاربىر تۇساۋكەسەر راسىمىنە ارنايى شاقىرىلعان قۇرمەتتى قوناقتار اتسالىستى.
«زەردەلى» ورتالىقتارى مەن مەكتەپتەر جەلىسىنىڭ نەگىزىن قالاۋشى ىرىسبەك ءماۋىتتىڭ ايتۋىنشا، بۇل ەڭبەكتەر مەكتەپ وقۋشىلارىنىڭ لوگيكالىق ويلاۋ قابىلەتىن دامىتۋعا جانە وليمپيادا دايىندىعىن جەتىلدىرۋگە باعىتتالعان.
پرەزيدەنتىمىز قاسىم-جومارت كەمەلۇلى توقاەۆ اتاپ وتكەندەي، بىزگە ورنىقتى دامىپ، باسەكەگە قابىلەتتى بولۋ ءۇشىن ماتەماتيكا مەن جاراتىلىستانۋ پاندەرىنىڭ ساپاسىن ارتتىرۋ قاجەت. سوندا عانا ساياساتىمىزعا سايكەس «تەحنوكراتيالىق ەل» بولا الامىز دەگەن ۇستانىمىن باسشىلىققا العان ىرىسبەك ءماۋىتتىڭ وسى جولعا قوسقان ۇلەسى زور.
شارا سوڭىندا زەردەلى مەكتەپتەرىندە ەڭبەك ەتكەن 35 ۇستازعا سينگاپۋرعا تاجىريبە الماسۋعا سەرتيفيكاتتار تابىستالدى. بۇل ۇستازدارعا بەرىلىپ جاتقان ۇلكەن مۇمكىندىكتىڭ ءبىرى. ەسكە سالا كەتەيىك، وتكەن جىلى 30 دان اسا ۇستازدى لوندونداعى ءبىلىم وردالارىنا تاجىريبە الماسۋعا جىبەرگەن بولاتىن.
جوبانىڭ بولاشاعى ۇلكەن، ال جارىق كورگەن كىتاپتار وقۋشىلار مەن مۇعالىمدەر ءۇشىن ماڭىزدى وقۋ قۇرالى بولماق. بۇگىن دە ءدال وسى وقۋ ادىستەمەلەرىمەن مەملەكەتتىك ءبىلىم بەرۋ ۇيىمدارى دا وقۋشىلارعا ساباق بەرۋدە.
