2024 jyldyń 10 jeltoqsanynda Astanada Zerdeli mektepteri men ortalyqtarynyń «10 jylda jaryq kórgen 100 kitap» atty tusaýkeser sharasy ótti. Bul mańyzdy joba bilim berý salasyndaǵy jańashyldyq pen el bolashaǵyna qosqan úlestiń jarqyn kórinisi.
Tusaýkeserge QR Parlamenti Senatynyń depýtaty Orynbaev Bekbol Tileýmuratuly, Tolamısov Amangeldi Ǵabdylkárimuly, Májilis depýtattary Nurgúl Taý, Quspekov Oljas, QR Oqý-aǵartý mınıstrlıgi Orta bilim berý komıtetiniń Tóraǵasy Jumashev Bekbolat Qanybekuly jáne bilim salasynyń zııaly qaýym ókilderi qatysty.
Sharanyń ashylýynda QR Parlamenti Senatynyń depýtaty Bekbol Tileýmuratuly: «Eldiń damýy úshin árbir adamnyń tereń bilimdi nemese eńbekqor bolýy mańyzdy. Prezıdentimiz Qasym-Jomart Toqaev atap ótkendeı, bizge «tehnokratııalyq el» bolý úshin matematıka men jaratylystaný pánderiniń sapasyn arttyrý qajet. Zerdeli mektepteri osy maqsatqa adal qyzmet etip keledi. 10 jyl ishinde 100 oqýlyq jazý – el damýyna qosqan zor úles», – dep atap ótti.
Kitaptar mazmuny boıynsha matematıka, jaratylystaný, gýmanıtarlyq jáne aǵylshyn tili pánderine arnalǵan eńbekterge toptastyryldy. Árbir tusaýkeser rásimine arnaıy shaqyrylǵan qurmetti qonaqtar atsalysty.
«Zerdeli» ortalyqtary men mektepter jelisiniń negizin qalaýshy Yrysbek Máýittiń aıtýynsha, bul eńbekter mektep oqýshylarynyń logıkalyq oılaý qabiletin damytýǵa jáne olımpıada daıyndyǵyn jetildirýge baǵyttalǵan.
Prezıdentimiz Qasym-Jomart Kemeluly Toqaev atap ótkendeı, bizge ornyqty damyp, básekege qabiletti bolý úshin matematıka men jaratylystaný pánderiniń sapasyn arttyrý qajet. Sonda ǵana saıasatymyzǵa sáıkes «tehnokratııalyq el» bola alamyz degen ustanymyn basshylyqqa alǵan Yrysbek Máýittiń osy jolǵa qosqan úlesi zor.
Shara sońynda Zerdeli mektepterinde eńbek etken 35 ustazǵa Sıngapýrǵa tájirıbe almasýǵa sertıfıkattar tabystaldy. Bul ustazdarǵa berilip jatqan úlken múmkindiktiń biri. Eske sala keteıik, ótken jyly 30 dan asa ustazdy Londondaǵy bilim ordalaryna tájirıbe almasýǵa jibergen bolatyn.
Jobanyń bolashaǵy úlken, al jaryq kórgen kitaptar oqýshylar men muǵalimder úshin mańyzdy oqý quraly bolmaq. Búgin de dál osy oqý ádistemelerimen memlekettik bilim berý uıymdary da oqýshylarǵa sabaq berýde.
