ەلىمىزدە قارجى پيراميدالارى 20 ملرد تەڭگە شىعىن كەلتىردى. بۇل تۋرالى قارجى مونيتورينگ اگەنتتىگى مالىمدەدى، دەپ حابارلايدى «ادىرنا» ءتىلشىسى.
بۇگىنگى تاڭدا 13 ملرد تەڭگەدەن استام قاراجات وتەلگەن.
«جىل باسىنان بەرى قما 20 ملرد تەڭگەدەن اسا شىعىنمەن قارجى پيراميدالارىن قۇرۋ جانە باسقارۋ فاكتىلەرى بويىنشا 68 قىلمىستىق ءىستى تەرگەدى. جالپى بيىل جىل باسىنان بەرى عالامتور جەلىسىندە 47 قارجى پيراميداسى انىقتالدى. ولارعا قاتىستى الەۋمەتتىك جەلىلەردە 300-گە جۋىق چات جابىلعان. شامامەن 2 ميلليونعا جۋىق قاتىسۋشى – الەۋەتتى سالىمشىلار بولعان»،—دەلىنگەن حابارلامادا.
قما جىل باسىنان بەرى قارجى پيراميداسىنىڭ بەلگىسى بار 10,5 مىڭنان اسا سايت سىلتەمەسىن بۇعاتتاعان. قارجىلىق مونيتورينگ اگەنتتىگى ازاماتتاردى قىراعى بولۋعا جانە ءوز اقشالارىن كۇماندى قارجى ۇيىمدارىنا سالماۋدى ەسكەرتتى.
