سيريا باسشىسى باشار اساد ۇكىمەتكە قارسى كۇشتەردىڭ شابۋىلىنان كەيىن ماسكەۋگە قاشىپ كەتتى. بۇل تۋرالى تاسس جازدى، دەپ حابارلايدى «ادىرنا» ءتىلشىسى.
شەتەلدىك باق-تىڭ مالىمەتىنشە، رەسەي پرەزيدەنت مەن ونىڭ وتباسىنا باسپانا بەرگەن.
«اساد ءۇي-ىشىمەن بىرگە ماسكەۋدى پانالادى. رەسەي گۋمانيتارلىق سيپاتتاعى نەگىزدەرگە سۇيەنە وتىرىپ، ولارعا باسپانا بەردى»،—دەلىنگەن حابارلامادا.
قارۋلى سيريالىق وپپوزيتسيا باسشىلارى رەسەيدىڭ اسكەري بازالارى مەن ديپلوماتيالىق مەكەمەلەرىنىڭ قاۋىپسىزدىگىنە كەپىلدىك بەرگەنى اتاپ ءوتىلدى.
اگەنتتىك دەرەككوزىنىڭ ايتۋىنشا، رەسەي فەدەراتسياسى بۇۇ قامقورلىعىمەن سيرياداعى كەلىسسوزدەردى قايتا باستاۋ قاجەت دەپ سانايدى.
ەلدى 24 جىل باسقارعان باشار اساد ديماشىقتان كەتتى دەگەن اقپارات كوپشىلىككە جەكسەنبىگە قاراعان ءتۇنى تاراعان ەدى. ول بيلىككە 2000 جىلى كەلگەن. ال اكەسى سيريانى وعان دەيىن 1971 جىلدان باسقارعان. بۇعان دەيىن سيريا پرەزيدەنتى وتىرعان ۇشاق اتىپ ءتۇسىرىلدى دەگەن بولجامدار ايتىلعان بولاتىن.
ەسكە سالايىق، قىرعىزستاننىڭ ءبىرىنشى پرەزيدەنتى اسقار اقاەۆ تا 2005 جىلى ەلدە بولعان توڭكەرىستەن كەيىن باس ساۋعالاپ ماسكەۋگە قاشقان بولاتىن.