جۇما كۇنى سيريالىق ديكتاتور باشار اساد سيريادا قالىپ، ونىڭ وتباسى شەتەلگە كەتتى، دەپ حابارلايدى "ادىرنا" ۇلتتىق پورتالى The Wall Street Journal باسىلىمىنا سىلتەمە جاساپ.
اساد سيريادا قالعان، ال ونىڭ بالالارى مەن ايەلى وتكەن اپتادا رەسەيگە، كۇيەۋ بالاسى بىرىككەن اراب امىرلىكتەرىنە كەتكەن.
مىسىر مەن يوردانيا شەنەۋنىكتەرى اسادتى سيريادان كەتىپ، ۋاقىتشا كەڭەس قۇرۋعا شاقىرعان. بۇل كەڭەسكە وپپوزيتسيا وكىلدەرى قوسىلۋى ءتيىس دەپ مالىمدەدى شەنەۋنىكتەر. الايدا اقش-تاعى يوردانيا ەلشىلىگى يوردانيا شەنەۋنىكتەرىنىڭ سيريالىق ديكتاتوردى ەلدەن كەتۋگە شاقىرعانىن جوققا شىعاردى.
بۇعان دەيىن تۇرىك باسىلىمدارى اساد پەن سيريا ۇكىمەتى ەل استاناسى ديماشىقتان كەتكەنىن حابارلاعان بولاتىن. اساد وتباسىمەن بىرگە وپپوزيتسيالىق كۇشتەردىڭ شابۋىلىنا بايلانىستى تەگەرانعا كەتكەنىن دە ايتقان.
سول ۋاقىتتا CNN سيريالىق كوتەرىلىسشىلەر 2011 جىلى باستالعان كوتەرىلىس وشاعى بولعان دەراا قالاسىن باقىلاۋعا العانىن جانە ديماشىققا جاقىنداپ كەلە جاتقانىن مالىمدەدى.
اساد رەجيمىنە قارسى شابۋىلدار ەل استاناسىنىڭ سولتۇستىگى مەن وڭتۇستىگىندە قارقىن الا باستاعان كەزدە، كۇردتەر باسقاراتىن جاۋىنگەرلەر ەلدىڭ شىعىس بولىكتەرىنە قاراي قوزعالعان.
كۇرد كۇشتەرى سيريانىڭ سولتۇستىك-شىعىسىن باقىلاۋعا الىپ، ازاماتتىق سوعىس كەزىندە ون جىل بويى ۇلكەن قيىندىقپەن قول جەتكىزىلگەن اۆتونوميانى ورناتقان ەدى. الايدا ولار بۇل اۆتونوميانىڭ ەندى سيريالىق وپپوزيتسيا كوتەرىلىسشىلەرىنەن قاۋىپ ءتونىپ تۇرعانىنا الاڭداۋلى. كوتەرىلىسشىلەردىڭ نەگىزگى ماقساتى اساد رەجيمىن قۇلاتۋ بولعانىمەن، كۇرد جاۋىنگەرلەرى زورلىق-زومبىلىقتىڭ ءوز اۋماقتارىنا تارالۋى مۇمكىن دەپ قورقادى.
27 قاراشادا باستالعان شابۋىلدان كەيىن سيريالىق وپپوزيتسيا توپتارى الەپپو، يدليب، تەل-ريفات، حاما قالالارىن باسىپ الىپ، ديماشىققا دەيىنگى سوڭعى بەكىنىس سانالاتىن حومس قالاسىنا جاقىنداعان.
