فوتو: تاسس
سيرياداعى ادام قۇقىقتارى ورتالىعى (SOHR) ماسكەۋدە سيريانىڭ ەكس-پرەزيدەنتى باشار اسادتى الدەكىمدەردىڭ ۋلاماق بولعانى تۋرالى مالىمدەدى. بۇل تۋرالى Bloomberg جازدى، دەپ حابارلايدى “ادىرنا”.
ۇيىمنىڭ مالىمەتىنشە، اساد دۇيسەنبى كۇنى ماسكەۋ ماڭىنداعى اۋرۋحانادان شىققان. قازىرگى كەزدە ونىڭ جاعدايى تۇراقتى دەپ باعالاندى.
ەمدەلۋ كەزىندە وعان تەك ءىنىسى ماحير اساد پەن پرەزيدەنت اپپاراتىنىڭ بۇرىنعى باس حاتشىسى مانسۋر اززام عانا كىرە العان.
دەرەككوزدەردىڭ ايتۋىنشا، قاستاندىقتىڭ ماقساتى — رەسەي ۇكىمەتىن ىڭعايسىز جاعدايعا قالدىرىپ، ونى ەكس-پرەزيدەنتتىڭ ولىمىنە ايىپتى ەتىپ كورسەتۋ بولعان. رەسەي تاراپى بۇل وقيعاعا رەسمي پىكىر بىلدىرگەن جوق.
بۇرىنعى پرەزيدەنت باشار اساد بيلىك اۋىسقاننان كەيىن سيريادان كەتىپ، رەسەيدە ساياسي باسپانا الىپ، قورعالعان جاعدايدا تۇرىپ جاتىر.
