تاۋەلسىزدىك كۇنى قارساڭىندا «AMANAT» پارتياسىنىڭ قولداۋىمەن مادەنيەت جانە اقپارات مينيسترلىگى ۇيىمداستىرعان «التىن دومبىرا» رەسپۋبليكالىق اقىندار ايتىسى باستالدى. «تورلەت، ەڭبەك ادامى» تاقىرىبىنداعى ءداستۇرلى دودا بيىل ەڭبەك ادامىن ۇلىقتاۋعا ارنالدى.
ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ پرەزيدەنتتىڭ ءتول مادەنيەتىمىزگە قامقورلىق تانىتىپ، ەرەكشە كوڭىل ءبولىپ وتىرعانىن اتاپ ءوتتى.
«مەملەكەت باسشىسى ايتىستى، ۇلتتىق قۇندىلىقتارىمىزدى، ۇلتتىق سپورتىمىزدى بارىنشا قولداپ كەلەدى. وتكەندە عانا دۇنيەجۇزىلىك كوشپەندىلەر ويىنى جوعارى دەڭگەيدە ءوتتى. بۇدان بولەك، بيىلدىڭ وزىندە رۋحانياتقا ەڭبەگى سىڭگەن ءبىراز ۇلى قايراتكەرلەرىمىزدىڭ مەرەيتويلارىن اتاپ وتتىك. سولاردىڭ بارىنە پرەزيدەنتىمىز ۇدايى قولداۋ كورسەتىپ كەلەدى. مەملەكەت باسشىسى الەمدىك ساياساتتا، جاھاندىق دەڭگەيدە ۇلتىمىزدىڭ رۋحىن اسقاقتاتىپ، مەملەكەتىمىزدىڭ مۇددەسىن، حالقىمىزدىڭ نامىسىن قورعاپ ءجۇر», – دەدى ە.قوشانوۆ.
ءماجىلىس سپيكەرى قازىرگى ۋاقىتتا قوعامدا پرەزيدەنتتىڭ «ادال ادام – ادال ەڭبەك – ادال تابىس» قاعيداسى ورنىعا باستاعانىنا نازار اۋداردى. بۇگىنگى الامان ايتىستىڭ دا تاقىرىبى وسىعان ارنالىپ وتىر.
«قاسىم-جومارت توقاەۆ 2025 جىلدى «جۇمىسشى ماماندىقتارى جىلى» دەپ جاريالادى. قاي ۋاقىتتا دا اقىندار ەرلىك پەن ەڭبەكتى جىرلاعان. شىن مانىندە، مەملەكەتتىڭ ىرىس-قۇتىن، ەلدىڭ بەرەكە-بىرلىگىن شاشاۋ شىعارماي ۇستاپ تۇرعان قاراپايىم ەڭبەك ادامدارى عوي. ولار تۋرالى قانشا مارتە جىرلاساق تا كوپتىك ەتپەيدى دەپ ويلايمىن. سوندىقتان، بۇگىنگى ءتورىمىز دە، ءسوزىمىز دە ەڭبەك ادامدارىنا ارنالماق»، – دەدى ە.قوشانوۆ.
ءوز كەزەگىندە، ايتىس تىزگىنىن ۇستاعان كورنەكتى اقىن، ءماجىلىس دەپۋتاتى امانجول ءالتاي ءدۇبىرلى دودانىڭ ءمانى مەن ماڭىزىنا توقتالىپ، قازىلار القاسىنىڭ قۇرامى مەن اقىندار قاۋىمىن تانىستىردى.
«ايتىس – بابادان قالعان بايراقتى ونەر. عاسىرلار قويناۋىنان جەتكەن قاستەرلى قازىنامىزدى ۇلىقتاۋ، ۇرپاقتان-ۇرپاققا جەتكىزۋ – بارشامىزعا ورتاق قاستەرلى پارىز. بۇگىن الدارىڭىزدا باعى مەن بابى كەلىسكەن شىن جۇيرىكتەر سىنعا تۇسەدى. ءتول ونەرىمىز تورگە وزا بەرسىن»، – دەدى ول.
وسىلايشا، ەكى كۇنگە جوسپارلانعان بيىلعى جىر دوداسىندا جىل كولەمىندە ەلىمىزدە وتكەن رەسپۋبليكالىق جانە حالىقارالىق ايتىستاردا ۇزدىك ونەر كورسەتىپ، جۇلدەلى ورىن ەنشىلەگەن 14 اقىن توپقا ءتۇستى.
سۋرەتتى تۇسىرگەن: ءالي عالىم
