Táýelsizdik kúni qarsańynda «AMANAT» partııasynyń qoldaýymen Mádenıet jáne aqparat mınıstrligi uıymdastyrǵan «Altyn dombyra» respýblıkalyq aqyndar aıtysy bastaldy. «Tórlet, eńbek adamy» taqyrybyndaǵy dástúrli doda bıyl eńbek adamyn ulyqtaýǵa arnaldy.
Májilis Spıkeri, «AMANAT» partııasynyń Tóraǵasy Erlan Qoshanov Prezıdenttiń tól mádenıetimizge qamqorlyq tanytyp, erekshe kóńil bólip otyrǵanyn atap ótti.
«Memleket basshysy aıtysty, ulttyq qundylyqtarymyzdy, ulttyq sportymyzdy barynsha qoldap keledi. Ótkende ǵana Dúnıejúzilik kóshpendiler oıyny joǵary deńgeıde ótti. Budan bólek, bıyldyń ózinde rýhanııatqa eńbegi sińgen biraz uly qaıratkerlerimizdiń mereıtoılaryn atap óttik. Solardyń bárine Prezıdentimiz udaıy qoldaý kórsetip keledi. Memleket basshysy álemdik saıasatta, jahandyq deńgeıde ultymyzdyń rýhyn asqaqtatyp, memleketimizdiń múddesin, halqymyzdyń namysyn qorǵap júr», – dedi E.Qoshanov.
Májilis Spıkeri qazirgi ýaqytta qoǵamda Prezıdenttiń «Adal adam – Adal eńbek – Adal tabys» qaǵıdasy ornyǵa bastaǵanyna nazar aýdardy. Búgingi alaman aıtystyń da taqyryby osyǵan arnalyp otyr.
«Qasym-Jomart Toqaev 2025 jyldy «Jumysshy mamandyqtary jyly» dep jarııalady. Qaı ýaqytta da aqyndar erlik pen eńbekti jyrlaǵan. Shyn máninde, memlekettiń yrys-qutyn, eldiń bereke-birligin shashaý shyǵarmaı ustap turǵan qarapaıym eńbek adamdary ǵoı. Olar týraly qansha márte jyrlasaq ta kóptik etpeıdi dep oılaımyn. Sondyqtan, búgingi tórimiz de, sózimiz de eńbek adamdaryna arnalmaq», – dedi E.Qoshanov.
Óz kezeginde, aıtys tizginin ustaǵan kórnekti aqyn, Májilis depýtaty Amanjol Áltaı dúbirli dodanyń máni men mańyzyna toqtalyp, qazylar alqasynyń quramy men aqyndar qaýymyn tanystyrdy.
«Aıtys – babadan qalǵan baıraqty óner. Ǵasyrlar qoınaýynan jetken qasterli qazynamyzdy ulyqtaý, urpaqtan-urpaqqa jetkizý – barshamyzǵa ortaq qasterli paryz. Búgin aldaryńyzda baǵy men baby kelisken shyn júırikter synǵa túsedi. Tól ónerimiz tórge oza bersin», – dedi ol.
Osylaısha, eki kúnge josparlanǵan bıylǵy jyr dodasynda jyl kóleminde elimizde ótken respýblıkalyq jáne halyqaralyq aıtystarda úzdik óner kórsetip, júldeli oryn enshilegen 14 aqyn topqa tústi.
Sýretti túsirgen: Álı Ǵalym
