قازىرگى تاڭدا قۇمار ويىندارعا تاۋەلدىلىك – قوعامنىڭ ەڭ وزەكتى ماسەلەلەرىنىڭ ءبىرى. لۋدومانيا، ياعني قۇمار ويىندارعا تاۋەلدىلىك، كوپتەگەن ادامداردىڭ ومىرىنە پسيحولوگيالىق، الەۋمەتتىك جانە قارجىلىق قيىندىقتار اكەلىپ، وتباسىلاردىڭ بەرەكەسىن قاشىرۋدا. قازاقستاندا بۇل قۇبىلىس جىل وتكەن سايىن كەڭ ەتەك جايىپ، اسىرەسە جاستار اراسىندا الاڭداۋشىلىق تۋعىزىپ وتىر.
2023 جىلى جۇرگىزىلگەن زەرتتەۋلەرناتيجەسى بويىنشا ەلىمىزدە 200 مىڭنان استام ادام قۇمار ويىندارعا تارتىلعان. ونىڭ ىشىندە جاستاردىڭ ۇلەسى ايتارلىقتاي جوعارى. ۆيرتۋالدى جانە وفلاين كازينولار مەن بۋكمەكەرلىك كەڭسەلەر ادامداردىڭ پسيحولوگياسىن تەرەڭ زەرتتەپ، ولاردىڭ نازارىن تولىقتاي اۋدارىپ الدى. ويىنشى ءوزىن توقتاتا الماي، شىنايى ءومىردىڭ ماڭىزدى جاقتارىن ۇمىتىپ، ۆيرتۋالدى الەمگە تاۋەلدى بولىپ قالادى. بۇل تەك جەكە ادامنىڭ عانا ەمەس، ونىڭ وتباسىنا دا، اينالاسىنا دا ۇلكەن پروبلەما تۋعىزادى.
لۋدومانيانىڭ باستى بەلگىلەرى – ويىنعا دەگەن باقىلاۋدى جوعالتۋ، «ەندى عانا جەڭىسكە جەتەمىن» دەگەن ۇمىتپەن ويىندى جالعاستىرا بەرۋ جانە قارجىلىق شىعىندارعا قاراماستان توقتاماۋ. ويىننىڭ شىرماۋىنا تۇسكەن ادام ءوزىنىڭ جاعدايىنىڭ اۋىرلىعىن تۇسىنسە دە، توقتاۋعا كۇشى جەتپەي قالادى. بۇل تەك قارجىلىق شىعىندارعا عانا ەمەس، پسيحولوگيالىق كۇيزەلىسكە، ءتىپتى وتباسىنداعى جانجالدارعا اكەلەدى.
قارجىلىق اۋىرتپالىق – لۋدومانيانىڭ ەڭ ەلەۋلى سالدارىنىڭ ءبىرى. قۇمار ويىندارعا تاۋەلدى ادام قارجىسىن باقىلاۋدى تولىقتاي جوعالتىپ، ۇلكەن قارىزدارعا بەلشەسىنەن باتىپ كەتەدى. "كەلەسى جولى ۇتامىن" دەگەن ۇمىتپەن سوڭعى اقشاسىن سالىپ، قارىزعا باتىپ، نەسيەلەرىن قايتارا الماي قالادى. وسىلايشا، قارجىلىق داعدارىس وتباسىنىڭ ءال-اۋقاتىن تومەندەتىپ، ءومىر ءسۇرۋ ساپاسىن ناشارلاتادى.
پسيحولوگيالىق تۇرعىدا لۋدومانيا ادامنىڭ پسيحيكاسىن السىرەتەدى. قۇمار ويىندارعا تاۋەلدى ادامداردىڭ كوپشىلىگى ءوزىن كىنالى سەزىنىپ، ىشكى جان دۇنيەسىندە كۇيزەلىس پەن مازاسىزدىقتى سەزىنەدى. بۇل پسيحولوگيالىق جاعداي ولاردىڭ ءوزىن-ءوزى باعالاۋىن تومەندەتىپ، جالعىزدىققا، دەپرەسسياعا، ءتىپتى سۋيتسيدتىك ويلارعا اكەلۋى مۇمكىن. بۇل تاۋەلدىلىك پسيحولوگيالىق جانە مەديتسينالىق تۇرعىدان ۇزاق ءارى كۇردەلى ەمدەۋدى تالاپ ەتەدى.
قازاقستاندا لۋدومانياعا قارسى كۇرەس ەندى-ەندى قولعا الىنىپ كەلەدى. قۇمار ويىن بيزنەسىنە قاتىستى زاڭنامالار كۇشەيتىلىپ، جاسوسپىرىمدەردىڭ قۇمار ويىندارعا قاتىسۋىنا قاتاڭ تىيىم سالىنۋدا. الايدا، بۇل ماسەلەنى تەك زاڭنامالىق تۇرعىدا شەشۋ جەتكىلىكسىز. ەڭ باستىسى – ءار ادامنىڭ ءوزىنىڭ جاۋاپكەرشىلىگى مەن ەرىك-جىگەرىن پايدالانىپ، بۇل تاۋەلدىلىكتەن ارىلۋعا ۇمتىلۋى قاجەت. لۋدومانياعا تاپ بولعان ادامدار ماماندارعا جۇگىنىپ، پسيحولوگيالىق قولداۋ الۋدان قاشپاۋى كەرەك.
قوعامدىق دەڭگەيدە بۇل ماسەلەنى اشىق تالقىلاۋ جانە قۇمار ويىنداردىڭ سالدارى تۋرالى اقپاراتتاندىرۋ جۇمىستارىن كۇشەيتۋ ماڭىزدى. قۇمار ويىندارعا قارسى ارنايى رەابيليتاتسيالىق ورتالىقتار مەن پسيحولوگيالىق قولداۋ كورسەتۋ قىزمەتتەرى ارتىپ كەلەدى. بىراق بۇل شارالار جەتكىلىكسىز. ءاربىر ادام قۇمار ويىنداردىڭ ءوز ومىرىنە قانداي قاۋىپ توندىرەتىنىن ءتۇسىنىپ، الدىن الۋ شارالارىن ءوزى قولعا العانى ءجون.
قۇمار ويىنداردان اۋلاق بولۋ – شىنايى ومىردەگى جەتىستىك پەن تىنىشتىققا جەتۋدىڭ باستى جولى. لۋدومانياعا تۇسكەن ادامدار تەك ۋاقىت پەن قارجىسىن جوعالتپايدى، ولار ءوز بولاشاعىنا دا قاۋىپ توندىرەدى. قوعامنىڭ ءاربىر مۇشەسى وسى زياندى ادەتتەن باس تارتىپ، ءوز ومىرىنە جاۋاپكەرشىلىكپەن قاراپ، شىنايى باقىت پەن تۇراقتىلىقتى ىزدەۋى كەرەك
