ءماجىلىس وتىرىسىندا دەپۋتات ەدىل جاڭبىرشين ارىپتەسى ازات پەرۋاشەۆتىڭ كاسىپكەرلەرگە سالىناتىن ايىپپۇلداردىڭ شامادان تىس كوپتىگى تۋرالى ايتقان پىكىرىنە جاۋاپ بەردى.
اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات جاڭبىرشين قولدانىستاعى ايىپپۇل جۇيەسىنىڭ وڭ ناتيجەلەرىن كورسەتىپ جاتقانىن اتاپ ءوتتى.
"مەن وسى نورمالار بويىنشا ءوز پىكىرىمدى بىلدىرگىم كەلەدى. مەدالدىڭ ەكى جاعى بار. ءبىزدىڭ باستى باسىمدىعىمىز كونستيتۋتسيامىزدىڭ ءبىرىنشى تارماعىندا جازىلعانداي، ادام ءومىرى، دەنساۋلىعى جانە قۇقىقتارىن قورعاۋ بولىپ تابىلادى. ءبىز ەڭ الدىمەن وسىنى قورعاۋىمىز كەرەك", – دەپ ەرەكشە اتاپ ءوتتى جاڭبىرشين.
ونىڭ ايتۋىنشا، انىقتالعان زاڭ بۇزۋشىلىقتاردىڭ باسىم بولىگى جارامدىلىق مەرزىمى وتكەن ونىمدەردى ساتۋ، تاۋارلاردىڭ تەحنيكالىق رەگلامەنتتەرگە سايكەس كەلمەۋى جانە باعالار تۋرالى شىنايى اقپاراتتىڭ بولماۋىمەن بايلانىستى.
"2023 جىلى ءساۋىر ايىندا جەرگىلىكتى اتقارۋشى ورگانداردان مەملەكەتتىك قاداعالاۋ ۇكىمەتكە بەرىلگەن. وسى ارادا بۇگىنگە دەيىن كاسىپكەرلەرگە 1059 اكىمشىلىك شارالار قولدانعان. ءبىرىنشى رەت زاڭدى بۇزعانى ءۇشىن. بۇل قانداي زاڭدى بۇزۋشىلار؟ وزدەرىڭىز جاقسى بىلەسىزدەر، كوبىڭىز جەرگىلىكتى جەردە جۇمىس جاسادىڭىزدار. بۇل - باعانى دۇرىس قويماۋ، باعانى ءتىپتى قويماۋ نەمەسە سورەلەردەگى تاۋارلاردىڭ باعاسىن ازايتاتىن اكتسيالار جازىپ قويادى"- دەدى ول.
ءماجىلىس دەپۋتاتى ارىپتەستەرىن جاعدايدى مۇقيات قاراستىرۋعا جانە كاسىپكەرلەردى قولداۋ مەن تۇتىنۋشىلاردىڭ قۇقىقتارىن قورعاۋ اراسىنداعى تەپە-تەڭدىكتى ساقتاۋعا شاقىردى.
"سوندىقتان، قۇرمەتتى ارىپتەستەر، بۇل نورما قازىردىڭ وزىندە ناتيجەلەرىن كورسەتىپ وتىر، ونى مۇقيات زەردەلەۋىمىز قاجەت. اسىعىس شەشىم قابىلداۋدىڭ قاجەتى جوق. ەگەر كاسىپكەر ادال جۇمىس ىستەپ، زاڭدى ساقتاسا، وعان الاڭداۋدىڭ قاجەتى جوق. باعانى دۇرىس كورسەت، ءادىل جۇمىس جاسا، ساپالى تاۋار سات – سوندا ەشكىم ساعان ايىپپۇل سالمايدى. ال ەگەر زاڭ بۇزساڭ، حالىق الدىندا جاۋاپ بەرۋگە تۋرا كەلەدى. ادال جۇمىس جاسا، ادامداردى الداما،" – دەپ تۇيىندەدى ماجىلىسمەن.
