بۇگىن ەلوردادا ەرەكشە فورماتتا وتكەن «تەڭ مۇمكىندىكتەر» ينكليۋزيالىق سپورت فەستيۆالىنىڭ جەڭىمپازدارىن ماراپاتتاۋ ءراسىمى ءوتتى. ءىس-شاراعا ەلىمىزدىڭ تۇكپىر-تۇكپىرىنەن 200-گە جۋىق بالا قاتىستى، ولاردىڭ ىشىندە 66-سى ەرەكشە قاجەتتىلىگى بار بالالار.
«تەڭ مۇمكىندىكتەر» فەستيۆالى «AMANAT» پارتياسى ايەلدەر قاناتىنىڭ باستاماسىمەن «كەدەرگىسىز كەلەشەك» جوباسى اياسىندا وقۋ-اعارتۋ مينيسترلىگى، قازاقستاننىڭ بوچچا فەدەراتسياسى، ۇلتتىق عىلىمي-پراكتيكالىق دەنە تاربيەسى ورتالىعى، سپورتتى دامىتۋ ديرەكتسياسى جانە استانا قالاسى اكىمدىگىمەن بىرلەسىپ ۇيىمداستىرىلدى.
ماراپاتتاۋ راسىمىندە پارتيا حاتشىسى شولپان كارينوۆا بۇل فەستيۆالدىڭ رەسپۋبليكالىق دەڭگەيدە العاش رەت ۇيىمداستىرىلعانىنا باسا نازار اۋداردى. ونىڭ ايتۋىنشا، «AMANAT» پارتياسىنىڭ «حالىقپەن بىرگە!» سايلاۋالدى باعدارلاماسى اياسىندا ەرەكشە ءبىلىمدى قاجەت ەتەتىن بالالارعا قولداۋ كورسەتۋ بويىنشا اۋقىمدى جۇمىستار اتقارىلۋدا. 
«مەملەكەت باسشىسى قاسىم-جومارت توقاەۆ ۇكىمەتكە جۇكتەگەن تاپسىرمالارىنىڭ بىرىندە قوعامدا سالاۋاتتى ءومىر سالتىن ناسيحاتتاۋ جانە بۇقارالىق سپورتتى دامىتۋ قاجەتتىگىن ايتقان بولاتىن. بۇل رەتتە پارتيامىزدىڭ سايلاۋالدى باعدارلاماسىندا كوزدەلگەن مىندەتتەردىڭ بارلىعى كەزەڭ-كەزەڭىمەن مەملەكەتتىك ورگاندارمەن بىرلەسىپ ىسكە اسىرىلىپ كەلەدى. بۇگىنگى فەستيۆال – وسى باعىتتا اتقارىلىپ جاتقان جۇمىستىڭ تاعى ءبىر ناتيجەسى. بۇل جارىستا جەڭىلگەندەر جوق دەپ ەسەپتەيمىن. ويتكەنى ەكى مىڭنان استام بالانىڭ اراسىنان ىرىكتەلگەن ەڭ مىقتى، ەڭ جىگەرلى قاتىسۋشىلار وسىندا باس قوستى. فەستيۆال الداعى ۋاقىتتا ءداستۇرلى تۇردە ۇيىمداستىرىلىپ، كوپتەگەن تالانتتى بالالاردىڭ سپورتقا دەگەن سۇيىسپەنشىلىگىن ارتتىرادى دەپ سەنەمىن»، – دەدى ول.
وقۋ-اعارتۋ مينيسترلىگىنىڭ ۇلتتىق عىلىمي-پراكتيكالىق دەنە تاربيەسى جانە سپورت ورتالىعىنىڭ باسشىسى ارمان تاشەتوۆ تە جارىستىڭ ماڭىزدىلىعىنا توقتالىپ ءوتتى.
«بۇل شارا – ەرەكشە قاجەتتىلىگى بار بالالاردىڭ الەۋەتىن ارتتىرۋعا باعىتتالعان ماڭىزدى قادام. جارىس تەك سپورتتىق سايىس قانا ەمەس، ول – جەڭىسكە دەگەن جىگەر مەن دوستىقتىڭ مەرەكەسى، تاجىريبە الماسۋ الاڭى. ەلىمىزدىڭ 16 وڭىرىنەن كەلگەن 195 باتىل دا ءور مىنەزدى سپورتشى سپورتتى دامىتۋعا ۇلەس قوسقان جارقىن ۇلگى رەتىندە ەستە قالادى»، – دەدى ول.
ءوز كەزەگىندە جارىسقا قاتىسۋشىلار مۇنداي فەستيۆالدەردىڭ ءاردايىم ەرەكشە جىگەر سىيلاپ، سپورتقا دەگەن سۇيىسپەنشىلىكتى وياتاتىنىن ايتتى.
«بۇل فەستيۆال ءبىز ءۇشىن ۇلكەن مۇمكىندىكتەردىڭ ەسىگىن اشتى. مۇنداي شارالار بىزگە جىگەر بەرەدى، جاڭا بەلەستەردى باعىندىرۋعا شابىتتاندىرادى. وسىنداي قولداۋ كورسەتكەندەرگە العىسىمىز شەكسىز»، – دەدى جارىسقا قاتىسۋشى ابىلاي ءامىرحانوۆ.
شارا سوڭىندا بارلىق قاتىسۋشىلار ارنايى مەدالدارمەن، ىنتالاندىرۋ سىيلىقتارىمەن جانە ديپلومدارمەن ماراپاتتالدى.
«تەڭ مۇمكىندىكتەر» ينكليۋزيالىق سپورت فەستيۆالى – ەرەكشە قاجەتتىلىگى بار بالالاردىڭ سپورتقا قىزىعۋشىلىعىن ارتتىرۋعا جانە ولاردىڭ الەۋەتىن اشۋعا باعىتتالعان ماڭىزدى قادام. مۇنداي اۋقىمدى شارالار قوعامدا سالاۋاتتى ءومىر سالتىن ناسيحاتتاپ، بۇقارالىق سپورتتى دامىتۋعا زور ىقپال ەتەدى.
